იურიდიულ საკითხთა კომიტეტის თავმჯდომარე, ანრი ოხანაშვილი აცხადებს, რომ მმართველი პარტია არა "შურისძიებით", არამედ "ევროპული სტანდარტებით" ხელმძღვანელობს. ასე ეხმაურება ის ექსპრეზიდენტის, მიხეილ სააკაშვილის სამოქალაქო კლინიკაში გადაყვანის მოთხოვნას და ამბობს, რომ პენიტენციური დაწესებულების სამედიცინო განყოფილებაში ყველა შესაბამისი პირობაა შექმნილი.

"მე გეუბნებით და გიხსნით, რომ ჯანდაცვის სერვისები ხელმისაწვდომია, იუსტიციის მინისტრმა და შესაბამისმა ექსპერტებმა იცით, რომ გაასაჯაროვეს მასალა, სადაც [საუბარია], რომ შესაბამისი ოთახი ყველა საჭირო სამედიცინო რესურსითაა აღჭურვილი. ეს ნიშნავს, რომ პირობები შექმნილია, ოღონდ პირობები შექმნილია არა ამ პატიმარი სააკაშვილისთვის, არამედ ყველასთვის თანაბრად", — აცხადებს ის.

მისივე თქმით, პატიმართა უფლებების დაცვა ქართული ოცნების ხელისუფლების ძალიან მნიშვნელოვანი "გარღვევაა".

"ასე რომ, დამშვიდდნენ, დაწყნარდნენ, შესაბამისი დაწესებულება უზრუნველყოფს ყველა პირობას ყველა პატიმრისთვის და მათ შორის, ამ მსჯავრდებული და პატიმარი სააკაშვილისთვის", — თქვა მან რუსთავი 2-ის ეთერში.

დღეს ცნობილი გახდა, რომ სააკაშვილის ჯანმრთელობის მდგომარეობას ქართველებთან ერთად ჰოლანდიელი და უკრაინელი მედიკოსებიც შეისწავლიან. სააკაშვილის ადვოკატის, გიორგი გელხაურის ინფორმაციით, ჰოლანდიელი ექიმი საქართველოში დღეს ჩამოვიდა, ხვალ კი უკრაინიდან რეანიმატოლოგიც ჩამოვა.

მიხეილ სააკაშვილი პირველ ოქტომბერს დააკავეს, ის 26 დღეა შიმშილობს. როგორც მისი პირადი ექიმი, ნიკოლოზ ყიფშიძე ამბობს, ექსპრეზიდენტის ჯანმრთელობის მდგომარეობა ყოველდღე ცვალებადია, ამიტომ მას ნებისმიერ დროს, შეიძლება, კლინიკაში გადაყვანა დასჭირდეს. სააკაშვილის მოთხოვნაა, რომ ის სამოქალაქო კლინიკაში მოათავსონ, თუმცა ოფიციალური უწყების განცხადებით, საჭიროების შემთხვევაში მას პენიტენციური დაწესებულების სამედიცინო დეპარტამენტში გადაიყვანენ.

მიხეილ სააკაშვილის ადვოკატებმა საჯაროდ მიმართეს ჯანდაცვის მინისტრის, ეკატერინე ტიკარაძეს და სთხოვეს განმარტება — არის თუ არა ე.წ. ციხის საავადმყოფო იმ ტიპის მულტიფუნქციური დაწესებულება, რომელიც განსაზღვრა კონსილიუმმა სააკაშვილის სამკურნალოდ. გარდა ამისა, გვარამია მიმართავს სახალხო დამცველს და შეისწავლოს, შეესაბამება თუ არა ე.წ. ციხის საავადმყოფო C კატეგორიის, მულტიფუნქციური კლინიკის სტანდარტებს.

იმავე დღეს, სახალხო დამცველის რწმუნებულებმა შეისწავლეს მე-18 სამედიცინო დაწესებულება და განაცხადეს, რომ იგი სრულად არ შეესაბამება ექიმთა კონსილიუმის რეკომენდაციებს. ასევე, არსებობს რისკები ექსპრეზიდენტის უსაფრთხოებაზეც.