ევროპარლამენტარი და ევრონესტის თავმჯდომარე ანდრიუს კუბილიუსი მიხეილ სააკაშვილის ირგვლივ საქართველოში მიმდინარე პროცესებზე დასმული კითხვის პასუხად აცხადებს, რომ სასამართლოს პოლიტიზირება ქვეყანაში დასრულებული არ არის და რომ ის კვლავ უდიდესი პრობლემაა. მისივე თქმით, თუ პოლარიზაცია არ შემცირდება, უშუალოდ საქართველოსთან ერთად, ასოცირებული ტრიოს ინტეგრაციის პროცესიც დაზარალდება. ამის შესახებ კუბილიუსმა საქართველოს პოლიტიკის ინსტიტუტის (GIP) მიერ ორგანიზებულ ონლაინ შეხვედარზე ისაუბრა.

"გაოცებული დავრჩით პრემიერმინისტრის განცხადებით, სადაც ამბობდა, რომ თუ სააკაშვილი წესიერად არ მოიქცეოდა, მის წინააღმდეგ ახალი საქმეები გაჩნდებოდა. ამ განცხადებამ აჩვენა, რომ სასამართლოს პოლიტიზირება საქართველოში დასრულებული არ არის და ეს უდიდესი პრობლემაა", — განაცხადა კუბილიუსმა TV პირველის ჟურნალისტის კითხვის პასუხად.

მისივე თქმით, საქართველოს მესამე პრეზიდენტის საქმესთან დაკავშირებით მმართველ პარტიას მკაფიო პასუხების გაცემა მოუწევს. მან, ასევე, აღნიშნა, რომ პოსტსაბჭოთა ქვეყნებისთვის დამახასიათებელია, როცა სამართლებრივი გადაწყვეტილებებს არა სამართლიანობის დასამკვიდრებლად, არამედ ოპოზიციის წინააღმდეგ საბრძოლველად იყენებენ.

"ვერ ვიტყვი, რა მიმართულებით უნდა შეამციროს ხელისუფლებამ პოლარიზაციის დონე, მაგრამ თუ ისინი ამ სიტუაციიდან გამოსვლას ვერ შეძლებენ, ეს არა მხოლოდ საქართველოს, არამედ ასოცირებული ტრიოს ინტეგრაციის პროცესს დააზიანებს", — განაცხადა ევროპარლამენტარმა.