ექსპრეზიდენტს,მიხეილ სააკაშვილს მოწინააღმდეგეები რუსთავის ციხესთან აქციას უმართავენ.

აქციის ერთ-ერთი მონაწილის, ტრისტან წითელაშვილის თქმით, ისინი აპროტესტებენ იმას, რომ ისმის განცხადებები მის უდანაშაულობაზე.

"დღეს ვაპროტესტებთ იმას, რომ მიხეილ სააკაშვილი, რომელიც სამართლიანად იხდის სასჯელს და ზის სასჯელაღსრულების დაწესებულებაში[...] ისმის განცხადებები, რომ ის არის პოლიტპატიმარი, რომ მას არ ჩაუდენია დანაშაულები. ჩვენ დღეს, პოლიტპატიმრები, მოვედით აქ იმისთვის, რომ საზოგადოებას მივაწოდოთ ინფორმაცია, თუ რა დღეში ვიყავით ჩვენ იმ დროს, როდესაც მან დაიწყო რეპრესიები საქართველოში", — ამბობს წითელაშვილი.

აქციაზე გაჟღერდა მოთხოვნა, რომ აიკრძალოს ნაციონალური მოძრაობა, როგორც პოლიტიკური პარტია და მიხეილ სააკაშვილს მიუსაჯონ სამუდამო პატიმრობა.

იქ მყოფები ამბობენ, რომ ხალხმა თავი სპონტანურად მოიყარა თავი. ასევე, შეკრებაზე ექსპრეზიდენტის მიმართ ისმის შეურაცხმყოფელი განცხადებები.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა, სადაც ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა ექიმმა, ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.