"სანამ არ გაივსო თავისუფლების მოედანი და რუსთაველის გამზირის ნაწილი, არ მოისვენეს", — აცხადებს ნაციონალური მოძრაობის ლიდერი, ნიკა მელია ექსპრეზიდენტის, მიხეილ სააკაშვილის მხარდამჭერი აქციის შემდეგ და ამბობს, რომ "ივანიშვილის რეჟიმის მთელი კონსტრუქცია უნდა ჩამოინგრეს".

"რა ჩამოანგრევს ამ ყველაფერს? ის, რაც დღეს აქ ხდება. ძალიან მშვიდობიანი, ძალიან ხალხმრავალი შეკრება გაიმართა და მერწმუნეთ, ქართული ოცნება დღეს არის იმაზე სუსტი, ვიდრე ბევრს წარმოუდგენია, იმიტომ, რომ ყბადაღებული ეს საუბარი, 5 000 კაცს კრებენ, 4 000 კაცს, ესეც შეურაცხმყოფელი იყო ყოველთვის, მაგრამ იმდენი იძახეს, იძახეს გაუთავებლად, სანამ არ გაივსო თავისუფლების მოედანი და რუსთაველის გამზირის ნაწილი ერთად, მანამდე არ მოისვენეს. მაინტერესებს ხვალ რას იტყვიან, ზეგ რას იტყვიან", — თქვა მან TV პირველის ეთერში.

დღეს, 14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა. აქციაზე ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.