პარლამენტის დამოუკიდებელი დეპუტატი, სალომე სამადაშვილი ამბობს, რომ მას იმედი აქვს, ოპოზიცია წინა საპარლამენტო არჩევნების დროს დაშვებულ "შეცდომას" არ გაიმეორებს და არჩევნების მეორე ტურში მონაწილეობას მიიღებს.

"იმედია, ოპოზიცია, რომელმაც, საბოლოო ჯამში, პროპორციული უკვე მოიგო, არ გაიმეორებს 2020–ის შეცდომას (ცხადია, ჩემი აზრით). მეორე ტურებზე, სადაც შედგება, ყველგან გავა. დაველოდოთ დამკვირვებლებს შეფასებებს, მაგრამ, პრინციპულად, ამ უთანასწორო ბრძოლის წესებში, სამწუხაროდ, ბევრი არაფერი შეცვლილა. მიუხედავად ამისა, "ოცნება" დღეს სასიკვდილოდ დაიჭრა", — წერს სამადაშვილი Facebook გვერდზე.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.