აღმასრულებელი ვიცე-პრეზიდენტი, რობ ფარმანი აცხადებს, რომ ეგზიტპოლის ჩატარების დროს დაბრკოლებებს უქმნიდნენ და ძირითადად ხელს ცენტრალური საარჩევნო კომისია უშლიდათ.

"იმაზე დიდი პრობლემა გვქონდა, ვიდრე წინა ეგზიტპოლების დროს. ძირითადად ხელს გვიშლიდა ცენტრალური საარჩევნო კომისია, მაგრამ სხვებიც გვიქმნიდნენ დაბრკოლებებს. დილით ცენტრალურმა საარჩევნო კომისიას გვითხრა, რომ არ გვქონდა იქ ყოფნის უფლება, სადაც ვიყავით. შემდეგ დავწერეთ წერილი და დაგვიშვეს, ზოგმა PCR ტესტიც მოგვთხოვა მათთვის, ვინც გამოკითხვას ატარებდა", — აცხადებს ის ფორმულას ეთერში. [ფორმულას თარგმანი]

მისივე თქმით, უბანზე მყოფი პარტიების წარმომადგენლებიც უქმნიდნენ სირთულეებს და ეუბნებოდნენ, რომ იქ ყოფნის უფლება არ ჰქონდათ.

"იყვნენ პარტიების წარმომადგენლებიც, რომლებიც უბნებზე დამკვირვებლები იყვნენ და ისინიც გვიქმნიდნენ სირთულეებს, გვეუბნებოდნენ, რომ არ გვქონდა იქ ყოფნის უფლება. შეიძლება, ცდილობდნენ ხმების დაცვას, თუმცა ჩვენ ნამდვილად გვქონდა კონკრეტულ უბნებზე ყოფნის უფლება. 18:00 საათისთვის კომისიის წარმომადგენლებმა გვითხრეს, რომ ეგზიტპოლის ჩატარების უფლება აღარ გვქონდა და მოგვცეს კიდეც წერილი, რომ უნდა დაგვეტოვებინა ტერიტორია. ამან იმოქმედა გამოკითხვებზე, მაგრამ ყველა უბანზე ასე არ მოხდა", — აცხადებს ფარმანი.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებს და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.