ნაციონალური მოძრაობის თავმჯდომარის, ნიკა მელიას თქმით, ქართულმა ოცნება თბილისში დიდი სხვაობით აგებს.

"როგორც თბილისის მერობის კანდიდატმა მინდა მოგმართოთ ჩემს ფეისბუქ მეგობრებს, დანამდვილებით შემიძლია უკვე გითხრათ, რომ თბილისი ქართულმა ოცნებამ წააგო. წააგო დიდი სხვაობით, აგებს ბატონი კალაძეც თბილისს. თბილისის მერობის ნაწილშიც და პარტიულ ნაწილშიც ჯამურად ოპოზიცია მნიშვნელოვნად უგებს. საკრებულო თავიდან ბოლომდე აქვს წაგებული. უმრავლესობით მოდის თბილისში მმართველობაში ოპოზიცია და თბილისის მერობის ნაწილშიც ვიმარჯვებთ, ამიტომ ახლა მნიშვნელოვანია, რომ ვინც კი არ მისულხართ არჩევნებზე, ან ვერ მოახერხეთ, ან ახლა აპირებთ მივიდეთ, ყველა ჩვენს მეგობარს, ოჯახის წევრს, ნათესავს, დავურეკოთ, შევეხმიანოთ და საქმე მივიყვანოთ ბოლომდე", — აცხადებს მელია ფეისბუქჩართვაში.

მისივე თქმით, ქართული ოცნება რეფერენდუმის ნაწილშიც აგებს და თბილისის მერობის ნაწილშიც.

"საქმე მივიყვანოთ ბოლომდე, ანუ გამარჯვებამდე. პასუხს ვაგებ ჩემს თითოეულ სიტყვაზე და გასამხნევებლად, უბრალოდ, არც საკუთარი თავის და არც თქვენი ამ ფეისბუქჩართვას არ ვახორციელებ. უბრალოდ, მონაცემებზე დაყრდნობით გეუბნებით, თბილისი ქართულმა ოცნებამ წააგო. აგებენ ორივე ნაწილში, რეფერენდუმის ნაწილში ჯამურად, მნიშვნელოვნად, დრამატულად აგებენ და აგებენ თბილისის მერის ნაწილშიც, ამიტომ წავედით ყველანი არჩევნებზე, ვინც ჯერ არ ვყოფილვართ", — თქვა მელიამ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.