სამართლიანი არჩევნებისა და დემოკრატიის საერთაშორისო საზოგადოება, ფონდი ღია საზოგადოება - საქართველო, საქართველოს ახალგაზრდა იურისტთა ასოციაცია, საერთაშორისო გამჭვირვალობა - საქართველო - აღნიშნულმა არასამთავრობო ორგანიზაციებმა და ომბუდსმენმა ე.წ. მოსმენების კანონზე, შესაძლოა, სასამართლოს კიდევ ერთხელ მიმართონ.

იმ შემთხვევაში, თუ პარლამენტი პრეზიდენტის ვეტოს დაძლევს, მის შენიშვნებს არ გაითვალისწინებს და კანონპროექტს არსებული სახით მიიღებს, სახალხო დამცველი არ გამორიცხავს, რომ სასამართლოში სარჩელი ხელახლა შეიტანოს. მისივე თქმით, კანონპროექტით ხდება მხოლოდ კოსმეტიკური ცვლილება და სისტემა რჩება იგივე:

"მიგვაჩნია, რომ ეს გადწყვეტილება არ შეესაბამება საკონსტიტუციო სასამართლოს გადაწყვეტილებას, ამიტომ ჩვენ არ გამოვრიცხავთ, რომ ხელახლა შევიტანოთ საკონსტიტუციო სასამართლოში ჩვენი საჩივარი."

საკონსტიტუციო სასამართლომ, მოსმენების შესახებ კანონი არაკონსტიტუციურად სცნო. სასამართლომ ახალი კანონის მისაღებად პარლამენტს დრო 31 მარტამდე მისცა. პარლამენტმა ახალი კანონი 2 მოსმენით მიიღო, თუმცა საქართველოს პრეზიდენტმა გიორგი მარგველაშვილმა საკანონმდებლო პაკეტს ვეტო დაადო. პრეზიდენტის აზრით, კანონს ორი ძირითადი ხარვეზი აქვს:

  • პირველი, ეს არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი და შესაბამისად, ეწინააღმდეგება ამ საკითხზე საკონსტიტუციო სასამართლოს გადაწყვეტილებას.
  • მეორე ეს არის კანონპროექტში გაუმართლებელი და არაპროგნოზირებადი ხარჯები, რომელსაც ეს კანონპროექტი აკისრებს საკომუნიკაციო კომპანიებს.