ნაციონალური მოძრაობის წარმომადგენლის, ზვიად კუპრავას განცხადებით, უბნებზე მარკირების მოშორებაში ავარჯიშებენ. აღნიშნულზე მან საბურთალოს საარჩევნო ოლქის 76-ე და 52-ე საარჩევნო უბნებზე ისაუბრა, სადაც დღეს დაპირისპირება და ხმაური იყო.

უბნებზე მომხდარ დაპირისპირებას გამოეხმაურა ცენტრალური საარჩევნო კომისიაც. მათ შეაფასეს ადგილზე გაჟღერებული განცხადებები მარკირებს სითხის ვადების დარღევით მიიტანსთან დაკავშირებით და აღნიშნეს, რომ კანონმდებლობით არ არსებობს სპეციალური ვადები მარკირების სითხის უბნისთვის გადასაცემად.

"ყველა საუბნო საარჩევნო კომისიაში ეტაპობრივად ნაწილდება კენჭისყრის დღისთვის აუცილებელი ინვენტარი, მათ შორის მარკირების სითხე, საარჩევნო დოკუმენტაცია, სანიტარიულ-ჰიგიენური საშუალებები და ა.შ. ამ თემით მანიპულირება კი ჩართული მხარეებისგან წარმოადგენს საარჩევნო პროცესის მიზანმიმართულ ხელისშეშლას და მათი საქმიანობის დისკრედიტაციის მცდელობას", — აცხადებენ ცესკოში.

მათივე თქმით, მიუხედავად იმისა, ადგილზე მისულმა საბურთალოს საოლქო საარჩევნო კომისიის თავმჯდომარემ კუპრავას უთხრა, რომ საუბნო საარჩევნო კომისიებში ინვენტარი, მათ შორის მარკირების სითხეც, კანონით გათვალისწინებულ ვადებში, საჭირო რაოდენობით იყო მიტანილი მან "შეურაცხმყოფელი განცხადებები" გააგრძელა, რის გამოც, ოლქის თავმჯდომარეს პოლიციის გამოძახება "მოუხდა".

"ამასთან, საოლქო საარჩევნო კომისიის თავმჯდომარის და საუბნო საარჩევნო კომისიის წარმომადგენლების მიმართ გამოყენებული იყო სიძულვილის ენა და შეურაცხმყოფელი განცხადებები, ოლქის თავმჯდომარეს ასევე უწოდებდნენ სისხლის სამართლის დამნაშავეს და გაურკვეველი მიზეზების გამო საპატრულო პოლიციას სთხოვდნენ მარკირების სითხის ამოღებას", — აცხადებენ ცესკოში.

საქართველოში ადგილობრივი თვითმმართველობის არჩევნები 2 ოქტომბერს გაიმართება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.