საგარეო საქმეთა მინისტრის, დავით ზალკალიანის შეფასებით, საქართველოს პრემიერმინისტრის, ირაკლი ღარიბაშვილის გაეროს გენერალური ასამბლაზე სიტყვით გამოსვლა ყოვლისმომცველი იყო. მისი თქმით, პრემიერმა ქვეყნის ხელშესახებ პროგრესსზეც ისაუბრა, რაც ბუნებრივია.

"მნიშვნელოვანი გზავნილები გაკეთდა ქვეყნის სამომავლო პერსპექტივაზე და იმაზე, თუ როგორი ქვეყანა, როგორი სახელმწიფო უნდა იყოს საქართველო. ბუნებრივია, პრემიერმა ისაუბრა იმ პროგრესზე, რომელიც დღემდე ჩვენს ქვეყანას ჰქონდა და ეს პროგრესი მართლაც ხელშესახებია, თუნდაც ის მიღწევები, რომელიც პრემიერმინისტრმა საკუთარ გამოსვლაში მოიყვანა ქვეყნის განვითარებასთან მიმართებაში", — განაცხადა ზალკალიანმა.

საგარეო საქმეთა მინისტრის აზრით, პრემიერმინისტრ ღარიბაშვილის გაეროში გამოსვლა "მუდმივად ხასიათდებოდა კონკრეტული ინიციატივების წარმოჩენით".

"ერთი, განსაკუთრებით მნიშვნელოვანი ინიციატივა, რომელიც პრემიერმა გააჟღერა გაეროს გენერალური ასამბლეის ტრიბუნიდან, ეს გახლავთ ახალი ინიციატივა სამხრეთ კავკასიის სამშვიდობო-სამეზობლო ინიციატივის სახით. ეს უაღრესად მნიშვნელოვანი ინიციატივაა. მე მინდა ვთქვა, რომ პრემიერ ღარიბაშვილის გაეროში გამოსვლა, წინა წლები მაქვს მხედველობაში, მუდმივად ხასიათდებოდა კონკრეტული ინიციატივების წარმოჩენით", — აღნიშნა მან.

25 სექტემბერს საქართველოს პრემიერმინისტრი, ირაკლი ღარიბაშვილი გაეროს გენერალური ასამბლეის 76-ე სესიაზე სიტყვით გამოვიდა. ღარიბაშვილმა გამოსვლისას სხვა საკითხებთან ერთად აღნიშნა, რომ ის ქვეყნითა და ქართული ოცნების გაკეთებული საქმეებით ამაყობს. ამავე გამოსვლაში ღარიბაშვილმა გაეროს წევრ ქვეყნებს თხოვნით მიმართა, რომ რუსეთის მიერ საქართველოს სუვერენული მიწების უკანონო ოკუპაცია ერთად დაასრულონ.