პარტია ევროპული საქართველოს ერთ-ერთი ლიდერის, გიგა ბოკერიას განცხადებით, იმ შემთხვევაში თუ ქართული ოცნება რიგგარეშე არჩევნების ჩატარებაზე უარს იტყვის, იმ ტიპის წნეხი იქნება მასზე, რომ ის ამას ვერ გაუძლებს. მისივე თქმით, "საკმარისი წინაპირობის არსებობა რეჟიმის გასატეხად აუცილებელია. ჟურნალისტმა მას ჰკითხა, რა გეგმა აქვს ოპოზიციას იმ შემთხვევაში, თუ ქართულმა ოცნებამ 43%-ზე ნაკლები აიღო და რიგგარეშე არჩევნების ჩატარებაზე უარი თქვა.

"მკაფიო მარცხის შემთხვევაში, ივანიშვილის რეჟიმს, რაც გულისხმობს მარტო 43%-ს კი არა და არა 42-ს ან... და ჩემი აზრით, ეგ ცუდი ტესტი იყო და არასწორი, მაგრამ რაც არი, ეგეთი არი, არამედ მარცხს საკვანძო ქალაქებში: თბილისში, თელავში, გორში, ქობულეთში, თერჯოლაში, ხონში, რუსთავში, გურჯაანში, არ მინდა, რომელიმე გამომრჩეს... ზუგდიდში... ამ ქალაქებში მარცხის შემთხვვევაში, იმ ტიპის წნეხი იქნება პოლიტიკურად ავტომატურად ქვეყნის შიგნიდან, ვითარებიდან გამომდინარე, ქვეყნის გარედან, თავისუფალი სამყაროდან ამ რეჟიმზე, რომ ჩემი მყარი რწმენაა, რომ ის ამას ვერ გაუძლებს", — განაცხადა ფორმულას ეთერში გიგა ბოკერიამ.

მისივე თქმით, სამოქალაქო პროტესტზე საუბარი ნაადრევია. ბოკერია მიიჩნევს, რომ რეჟიმის გასატეხად საჭირო წინაპირობას წარმოადგენს იმ მასშტაბის მარცხი, რომლის განეიტრალებაც შეუძლებელი იქნება.

"რა თქმა უნდა, სამოქალაქო პროტესტი თუ გახდება საჭირო, მათ შორის, მწვავე, ამას უნდა მიმართოს მოქალაქეებმა და პოლიტიკურმა პარტიებმა. ოღონდ ჯერ უნდა დადგეს ის წინაპირობა, რომელიც, ჩემი აზრით, იქნება საკმარისი ამ რეჟიმის გასატეხად. ეს წინაპირობაა იმ მასშტაბის მარცხი, რომლის განეიტრალებაც პოლიტიკურად იქნება შეუძლებელი და მაშინ სწორედ ის წნეხი, რაზეც იძახიან ხოლმე რო, აი, ჩვენ თავისუფალი სამყარო დაგვიჭერს თუ არა მხარს, ის დაუჭერს მხარს, როდესაც იქნება პოლიტიკური ნება ქართული საზოგადოების დიდი უპირატესობით", — თქვა ბოკერიამ.

ადგილობრივი თვითმმართველობის არჩევნები 2 ოქტომბერს გაიმართება.