სავარაუდოდ, სახელმწიფო უსაფრთხოების სამსახურიდან გამოჟონილი ფაილების მიხედვით, 2021 წლის იანვარში, მანამ, სანამ საქართველოში კორონავირუსის საწინააღმდეგო ვაქცინას შემოიტანდნენ, საპატრიარქოში ილია II-ს ვაქცინაციის საკითხი განიხილებოდა. დოკუმენტში ვკითხულობთ, რომ პატრიარქის ვაქცინაციასთან დაკავშირებით მისი გარშემომყოფები, ხელისუფლების წარმომადგენლები და ექიმები მსჯელობდნენ.

ფაილების მიხედვით, პატრიარქის დაცვის უფროსი ვანო კობაიძე ამ საკითხთან დაკავშირებით ერთ-ერთ სამედიცინო ცენტრის უფროსს, ცნობილ ექიმს ესაუბრა და უთხრა, რომ საპატრიარქოში ილია II-ს ვაქცინაციის საკითხი ნამდვილად განიხილება. ჩანაწერებში კობაიძე ამბობს იმასაც, რომ ხელისუფლების წარმომადგენლები მზად არიან, აცრის გაკეთების გადაწყვეტილების მიღების შემთხვევაში, უზრუნველყონ პატრიარქის ნებისმიერ ქვეყანაში გამგზავრება ან ვაქცინის საქართველოში ჩამოტანა.

[08.01.21, 13:13:43] : პატრიარქის დაცვის უფროს ვანო კობაიძესთან საუბარში, შპს - - პედიატრიული განყოფილების უფროსმა, თ.მ.-მ (ვინაობა დაშტრიხულია On.ge-ს რედაქციის მიერ) აღნიშნა, რომ უმჯობესი იქნება, თუ მოხდება კორონავირუსის საწინააღმდეგო ვაქცინის მოძიება და ილია მეორის აცრა. - - განმარტებით, უწმინდესის აცრის შემთხვევაში აუცილებლად უნდა იქნეს გამოყენებული საერთაშორისო ფარმაცევტული კომპანიების MODERNA-ს ან PFIZER-ის მიერ წარმოებული პრეპარატი.

ვ.კობაიძის განმარტებით, საპატრიარქოში ნამდვილად განიხილება ილია მეორისთვის ვაქცინის გაკეთების საკითხი. ამასთან, ხელისუფლების წარმომადგენლებმა გამოთქვეს მზაობა, რომ აცრის გაკეთების გადაწყვეტილების მიღების შემთხვევაში, უზრუნველყოფენ უწმინდესის ნებისმიერ ქვეყანაში გამგზავრებას, ან ვაქცინის საქართველოში ჩამოტანას. ვ.კობაიძის თქმით, ისრაელის სახელმწიფოს წარმომადგენლებმა გამოთქვეს მზაობა, პატრიარქისთვის და მისი ახლო გარემოცვისთვის უსასყიდლოდ გამოაგზავნონ ვაქცინის პრეპარატი. ვ.კობაიძემ ასევე განმარტა, რომ ილია მეორეს ესაუბრა - - გენერალური დირექტორი - - და შესთავაზა, რომ პირველმა თავად გაიკეთოს აცრა, ხოლო შემდეგ უწმინდესმა, თუმცა ამ ეტაპზე პატრიარქმა ვაქცინის გაკეთებაზე უარი განაცხადა. ვ.კობაიძის აზრით, უწმინდესი ენდობა - - და ინფექციური პათოლოგიის, შიდსის და კლინიკური იმუნოლოგიის ცენტრის გენერალური დირექტორ თენგიზ ცერცვაძეს, რომლებიც ვაქცინის გაკეთების საკითხზე, უახლოეს პერიოდში კვლავ გეგმავენ პატრიარქთან გასაუბრებას.

ფაილებში აღარ იძებნება ინფორმაცია იმის შესახებ, როგორ გაგრძელდა ამ საკითხზე მსჯელობა. ეს დოკუმენტები მხოლოდ 2021 წლის 23 თებერვლამდე მონაცემებს მოიცავს.

აღსანიშნავია, რომ ექიმების რჩევის მიუხედავად, სინოდმა მრევლს აცრისკენ არ მოუწოდა. საპატრიარქოს მღვდელმთავრებმა 2-საათიანი მსჯელობისას, სადაც ვაქცინის გარდა კიდევ 11 საკითხი განიხილეს, გადაწყვიტეს, რომ "პროპაგანდაზე" პასუხისმგებლობას ვერ აიღებენ, რადგან ეს "ჯანდაცვის მუშაკთა კომპეტენცია და პასუხისმგებლობაა". სინოდის განჩინებაში წერია ისიც, რომ მიესალმებიან, რომ კოვიდ-პანდემიასთან დაკავშირებული ვაქცინაციის პროცესი გამოცხადდა როგორც ნებაყოფილობითი და არა სავალდებულო.

ამასთან, სასულიერო პირებისა და მათ შორის სინოდის წევრების ნაწილი ვაქცინაციას ეწინააღმდეგება ან დეზინფორმაციას ავრცელებს.