პარლამენტის პლენარულ სხდომაზე მმართველი გუნდის წევრებმა 2011 წლის 26 მაისს აქციის დროს გარდაცვლილები გაიხსენეს და მათ პატივი წუთიერი დუმილით მიაგეს. ნაციონალურმა მოძრაობამ აღნიშნულში მონაწილეობა არ მიიღო, რასაც დარბაზში მყოფთა შორის დაპირისპირება მოჰყვა.

სხდომის დასაწყისში ნაციონალური მოძრაობის დეპუტატმა, ნუგზარ წიკლაურმა მმართველ გუნდს კორცხელის ინციდენტი შეახსენა და განაცხადა, რომ პრემიერ მინისტრსა და საგამოძიებო უწყებებს აღნიშნული საკითხის გამოძიებაში არაფრის გაკეთება არ შეუძლია:

"ეს იყო კარგად მომზადებული ადამიანების მიერ განხორციელებული დევნა საქართველოს მოქალაქეებზე. ეს იყო სამეგრელოს გათელვის მცდელობა და ქართული სახელმწიფოს გათელვის მცდელობა. იყო უმოწყალო დევნა მოქალაქეების, ქალების, ბავშვების. ყველაზე უფრო შთამბეჭდავი იმ დღეს მაინც იყო კრიმინალისგან შეშინებული პოლიციელის სურათი. შეუბრალებლად ნაცემი პოლიციელი და კრიმინალებისგან შეშინებული პოლიციელი".

წიკლაურმა განმარტა, რომ როგორც პოლიცია, ასევე პროკურატურა უძლურია აღნიშნული საქმის გამოძიების პროცესში და აუცილებელია დაუყოვნებლივ დაიკითხოს კახა კალაძე, რომელიც აღნიშნულ ინციდენტში მონაწილე ბანდ-ფორმირების ხელმძღვანელი პირი იყო:

"სისხლის სამართლის დანაშაული ჩადენილია სწორედ ამ ადამიანის მიერ".

სწორედ ამ განცხადების საპასუხოდ უმრავლესობის წევრმა, ზაზა პაპუაშვილმა ნაციონალურ მოძრაობას 2011 წლის 26 მაისის მოვლენები შეახსენა:

"როგორ გადაწმინდეს სისხლით ის პროსპექტი და როგორ რეკავდნენ საღამომდე წარმართულად და ამბობდნენ, რომ ჩვენ ვართ ყველაზე ძლიერიო. როდესაც იძახდნენ, მიშა, მიშა, ჩვენ მაშინ, ყველა ჩვენგანი, ვიძახდით, საქართველო. ყველას მინდა ქედი მოვუხარო, ვინც ამ ხროვას - ბოლშევიკებს ებრძოდა. რომელი ერთი ჩამოვთვალო, 7 ნოემბერი, 26 მაისი, არჩევნების გაყალბება".

მას შემდეგ, რაც დეპუტატებმა ერთიან ნაციონალურ მოძრაობას სწორედ 26 მაისს დაღუპულთა ხსოვნის პატივსაცემად ფეხზე წამოდგომისკენ და დუმილისკენ მოუწოდეს, ენმ-მ კი უარი განაცხადა, დარბაზში ურთიერთშელაპარაკების ნიადაგზე ფიზიკური შეხლა-შემოხლა დაიწყო.