ექსპრემიერი გიორგი გახარიას განცხადებით, ქართულმა ოცნებამ 100%-იც რომ აიღოს რიგგარეშე არჩევნები მაინც ჩატარდება. ასე ეხმაურება ის ირაკლი კობახიძის განცხადებას, რომ 1%-ის აღების შემთხვევაშიც კი არ დანიშნავენ რიგგარეშე არჩევნებს.

"მარტივად გეტყვით, შეხედეთ — დღეს ქვეყანას იმ ქაოსში, სადაც ახლა ვართ, თქვენ ხომ ხედავთ, რომ რეალურად ქვეყანა კარგად და ცუდად კი არა, უმართავია. ქაოსია ჩვეულებრივი ხომ. ერთი გამოვა რაღაცას იტყვის, მერე 180 გრადუსით დატრიალდებიან მეორეს ამბობენ. მარტივია, დღეს ქვეყანაში წესრიგის დამყარებაა საჭირო, სხვანაირად ჩვენ სახელმწიფოს მშენებლობა კი არა, რაც ბოლო ცხრა წლის განმავლობაში მიღწევები გვაქვს, იმასაც ვერ შევინარჩუნებთ. გავიგე, რომ ოცნება დღეს ქართული აღარ არის, მაგრამ იმას არ უარვყოფ, რომ..." — განაცხადა გახარიამ, რა დროსაც წამყვანი ჩაეკითხა არის თუ არა ოცნება რუსული. პასუხად გახარიამ თქვა: "გაურკვეველია საერთოდ".

მისი თქმით, ქართულ ოცნებას პოლიტიკური რესურსი არ აქვს და სწორედ ამიტომ გამოდიან და "ფეხების ბაკუნით" იმუქრებიან, რომ არჩევნების შემდეგ ყველას ადგილს მიუჩენენ და დასჯიან.

"რისი დამსჯელები არიან, ერთმანეთს ეშინიათ და ცხვირის წინ ვერ იყურებიან. ვინ უნდა დასაჯონ, ვის ემუქრებიან ჯერ საერთოდ. ესენი ემუქრებიან ხალხს, რომელიც სახელწმიფო სამსახურშია წლების განმავლობაში და კადრულობენ, რომ ვიღაცაზე თქვან, რომ სახელმწიფო უსაფრთხოების სამსახურიდან ინფორმაცია ამ... ნეტა გაბედონ, ნეტა გაბედონ და რაღაცა შეტევა მიიტანონ რომელიმე მათგანზე, მერე ნახავენ ცეცხლის გახსნა, როგორი უნდა", — განაცხადა მან.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.