მაისში ქართველი მოდელები ინდუსტრიაში არსებულ მძიმე ვითარებასა და შრომითი უფლებების დარღვევის შესახებ ალაპარაკდნენ. ამის შესახებ ინფორმაცია პირველად მოდის ქართულ ვებსაიტზე FashionHolics Online გამოქვეყნდა. აღნიშნული მოვლენებიდან რამდენიმე თვის თავზე საქართველოში მოდელების შრომითი უფლებების დასაცავად მოდის ინდუსტრიაში დასაქმებულთა პროფესიული კავშირი შეიქმნა.

მოდელების პროფკავშირის დამფუძნებლებმა 7 სექტემბერს შეხვედრა პროფკავშირების გაერთიანებასა და ორგანიზაცია "ქალები საერთო მომავლისთვის (WECF) საქართველოსთან" გამართეს. შეხვედრაზე დამფუძნებლებმა და წევრებმა პროფკავშირის შექმნის მიზეზებსა და აუცილებლობაზე ისაუბრეს. ამის შესახებ საქართველოს პროფკავშირების გაერთიანების ფეისბუქგვერდზე ვკითხულობთ.

"პირველ რიგში ვიტყვი, რომ გვჭირდება სივრცე, სადაც ელემენტარული ჰიგიენის ნორმები იქნება დაცული, უმეტეს შემთხვევებში მოდის კვირეულები, რომლებიც ტარდებოდა სხვადასხვა ლოკაციებზე, ვერ პასუხობს სანიტარიული მოთხოვნების ელემენტარულ სტანდარტებს. არ არის პირობები იმისთვის, რომ სრულფასოვნად იმუშაონ მოდელებს", — ამბობს პროფკავშირის დამფუძნებელი მოდელი ანა გავვა.

ანას თქმით, მოდელებს ხელი არ მიუწვდებათ გამოსაცვლელ კუთხესა და მოსასვენებელ სივრცეზე, აგრეთვე, არაა შესაბამისად უზრუნველყოფილი კვებისა და ტრანსპორტირების საკითხები. მისი თქმით, ხშირად პრობლემას შენობაში საპირფარეშოს არქონაც წარმოადგენს.

"სირცხვილია იმაზე საუბარი, რომ არ არის არც საპირფარეშო იმ შენობაში, სადაც გვიწევს მუშაობა", — ამბობს ანა გავვა.

შეხვედრაზე ისეთი პრობლემები დასახელდა, როგორებიცაა დისკრიმინაცია, კანონით დადგენილი სამუშაო საათების ლიმიტის გადაცილება, წერილობითი ხელშეკრულებების არარსებობა, ანაზღაურების საკითხთან დაკავშირებული სირთულეები და ა.შ.

შეხვედრას პარლამენტის გენდერული თანასწორობის საბჭო, საქართველოს კულტურის, სპორტისა და ახალგაზრდობის სამინისტრო, სახალხო დამცველის ოფისი, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო, შრომის ინსპექციის სამსახური, საქართველოს პროფესიული კავშირების გაერთიანება, შრომის საერთაშორისო ორგანიზაცია, პროფკავშირების საერთაშორისო ორგანიზაცია, ქალთა ადგილობრივი არასამთავრობო და საერთაშორისო ორგანიზაციები, სამოდელო სააგენტოები და ამ სფეროში დასაქმებული ადამიანები ესწრებოდნენ.

მაისში პირველი მოდელი, რომელიც მძიმე სამუშაო პირობებზე ხმამაღლა ალაპარაკდა, მარიშა ურუშაძე იყო.

"არ გვქონდა ჩამოსაჯდომი ადგილი, არც ტუალეტი იმავე შენობაში (გოგოების ნახევარს მენსტრუაცია ჰქონდა და ზოგიერთ მათგანს ტამპონის გამოცვლა კიბეებზე მოუწია), არ უზრუნველყვეს ტრანსპორტით ჩვენი გადაადგილება, არც კვება და ბოლოს ისე გამოვიდა, რომ ამაში დამნაშავეც არავინ იყო. ანაზღაურებაზე არც კი ვისაუბრებ, რაც ჩვენს შრომასთან შედარებით უბრალოდ სასაცილოა", — წერდა მოდელი Mercedes-Benz-ის მოდის კვირეულთან დაკავშირებული ერთ-ერთი გადაღების შესახებ ინსტაგრამის ე.წ. Story-ში.

"აღარ მინდა, თავს მონად ვგრძნობდე. დროა, ორგანიზატორებმა ისწავლონ, თუ როგორ უნდა იზრუნონ ჩვენს ელემენტარულ საჭიროებებზე", — დასძინა ურუშაძემ.

მარიშას ამ განცხადებას მალევე ამ სფეროში მომუშავე სხვა ადამიანებიც გამოეხმაურნენ. მათ შორის აღმოჩნდა ბალენსიაგას მოდელი ანი გავვა, რომელმაც ზოგადად ამ სფეროში გაწეული შრომისთვის სრულიად შეუფერებელი ანაზღაურების პრაქტიკაზე ისაუბრა.

"საზღვარგარეთ ერთ ჩვენებაზე საშუალოდ იხდიან 3 000/10 000 ეროვნულ ლარს ჩვენი ვალუტით. არანაკლებ ენერგიას და შრომას ვდებთ საქართველოშიც იმისთვის, რომ 200 ლარზე ვმათხოვრობდეთ, როდის ჩაგვირიცხავენ. თუ იმის პრეტენზია გვაქვს, რომ ზოგიერთი დიზაინერის ტანსაცმელი იყიდება ზუსტად იმავე ფასში, რაც დიდი და შემდგარი ბრენდების, [მაშინ] 1 ლუქის საფასური არ უნდა იყოს 20 მოდელის ერთიანი ჰონორარი", — წერდა ანი გავვა ასევე ინსტაგრამის პირად გვერდზე.

აღნიშნულ საკითხთან დაკავშირებით მალევე ოფიციალური განცხადება გაავრცელა Mercedes-Benz Fashion Week Tbilisi-მა. ინსტაგრამზე გამოქვეყნებულ პოსტში ორგანიზატორებმა აღიარეს "მთელი რიგი პრობლემების" არსებობა:

"სამწუხაროდ, მსოფლიო პანდემიის Covid-19 გამოწვევებმა უდიდესი დარტყმა მიაყენა ჩვენს სექტორს. ექსტრემალურ ვითარებაში ჩვენმა გუნდმა შეძლო მოდის კვირეულის ორგანიზება ციფრულ ფორმატში, ისევე როგორც წამყვანმა საერთაშორისო მოდის კვირეულებმა.

ამ პერიოდში გამოვლინდა მთელი რიგი პრობლემების, რომელიც მეტ კომუნიკაციას, ჩართულობასა და თანამშრომლობას საჭიროებს".

შეგახსენებთ, რომ ეს კი პირველი შემთხვევა იყო, როცა ქართველი მოდელები შეუსაბამო სამუშაო პირობებზე ღიად ალაპარაკდნენ.

ამავე თემაზე:

• "აღარ მინდა, თავს მონად ვგრძნობდე" — ქართველი მოდელები მძიმე სამუშაო პირობებზე საუბრობენ;
• ქალთა მოძრაობა მოდელების საქმეზე სახელმწიფო უწყებებს მიმართავს.