ქართული ოცნების დეპუტატი ბექა დავითულიანი გენერალური პროკურორის არჩევის წესის ცვლილების ჩაგდებაზე ამბობს, რომ თუ თუ საპარლამენტო პარტიები რიგდებიან, საელჩოების პოზიციებს ამ შემთხვევაში მნიშვნელობა საერთოდ არ აქვს. ის, ასევე, ირწმუნება, რომ წესის ცვლილებაზე ოპოზიციის მხრიდან არსებითი მოთხოვნა არ ყოფილა.

"ჩვენ ვთქვით, რომ ჩვენი კეთილი ნებით შევასრულებთ რიგ პირობებს, რაც წერია და ამ პირობებს ჩვენი კეთილი ნებით ვასრულებთ. ოპოზიციურ პარტიებსაც არსებითი მოთხოვნა გენპროკურორის არჩევის წესთან დაკავშირებით არ ჰქონია. თუ საპარლამენტო პარტიები რიგდებიან, რომ ეს არ არის პირველი ხარისხის ცვლილება და ჯობია ისე, როგორც არის, საელჩოების პოზიციას საერთოდ არ აქვს მნიშვნელობა ამ შემთხვევაში", — თქვა ბექა დავითულიანმა.

ევროკავშირის ელჩმა საქართველოში კარლ ჰარცელმა საქართველოს მიერ აღებული სასამართლო სისტემის რეფორმირების ვალდებულების თვალსაზრისით 8 სექტემბერს საკონსტიტუციო ცვლილებებზე უარის თქმას ორი თვის განმავლობაში მესამე წარუმატებლობად შეაფასა.

აშშ-ის საელჩომ კი პარლამენტის გადაწყვეტილებას მმართველი პარტიის კიდევ ერთი გატეხილი პირობა უწოდა.

პარლამენტმა მხარი დაუჭირა კანონპროექტს კონსტიტუციაში შესატან ცვლილებებთან დაკავშირებით, ერთი პუნქტის — გენერალური პროკურორის არჩევის წესის გამოკლებით. ცვლილებას მხარი 126-მა დეპუტატმა დაუჭირა, წინააღმდეგ კი არავინ წასულა. საკონსტიტუციო ცვლილებისთვის დაწესებული კვორუმი 113 ხმაა.

მმართველ პარტიასა და ოპოზიციის ნაწილს შორის აზრთა სხვადასხვაობა სწორედ გენერალური პროკურორის არჩევისთვის საჭირო ხმათა რაოდენობაზეა — ოპოზიციაში ფიქრობენ, რომ მხოლოდ ეს ცვლილება არ არის საკმარისი ამ ინსტიტუტის დამოუკიდებლობის აღიარებისთვის, თუმცა, აცხადებენ, რომ ამ ეტაპზე მნიშვნელოვანია შესრულდეს მიშელის დოკუმენტით განსაზღვრული დებულებები. გარდა ამისა, ოპოზიციაში აცხადებენ, რომ რაც უფრო მეტი დეპუტატის თანხმობა იქნება საჭირო გენერალური პროკურორის ასარჩევად, მით უფრო მეტი ლეგიტიმაცია ექნება არჩეულ კანდიდატს.

მმართველი პარტია მხარს უჭერს გენერალური პროკურორის არჩევას მხოლოდ 76 დეპუტატის თანხმობის საფუძველზე. პარტიის თავმჯდომარის, ირაკლი კობახიძის განცხადებით, ევროკავშირის წევრ ქვეყნებშიც თანამდებობის პირებს უბრალო უმრავლესობით ირჩევენ. ქართული ოცნების კიდევ არგუმენტი ეხება კანონპროექტის იმ ნაწილს, რომლის მიხედვითაც კვალიფიციური უმრავლესობით ორჯერ ვერარჩევის შემთხვევაში, მესამედ, 76 ხმით არჩეული პროკურორის უფლებამოსილების ვადა მხოლოდ ერთი წელია.

გაიგე მეტი: