ცენტრალური საარჩევნო კომისიის (ცესკო) თავმჯდომარე გიორგი კალანდარიშვილი საოლქო და საუბნო საარჩევნო კომისიებს მოუწოდებს თავი შეიკავონ ისეთი ქმედებისაგან, რომელიც შესაძლებელია რომელიმე საარჩევნო სუბიექტის მხარდამჭერ ან საწინააღმდეგო ქმედებად იქნას განხილული. გიორგი კალანდარიშვილი საოლქო საარჩევნო კომისიებს რეკომენდაციით მიმართავს, თავი შეიკავონ მათ შორის სოციალურ ქსელებში პირადი გვერდის პოლიტიკური მოწოდებებისა და აგიტაციის მიზნებისთვის გამოყენებისგან, პარტიის/კანდიდატის წინასაარჩევნო შეხვედრებში მონაწილეობისგან და საკუთარი პროფესიული საქმიანობა პოლიტიკური პროცესებისგან მაქსიმალურად გამიჯნონ.

ასევე, გიორგი კალანდარიშვილი საოლქო საარჩევნო კომისიებს მიმართავს თხოვნით, ზემოაღნიშნული შესაძლო ფაქტების პრევენციის მიზნით, ხსენებული რეკომენდაციების თაობაზე საუბნო საარჩევნო კომისიების წევრების დროული ინფორმირება მოახდინონ.

"საარჩევნო ადმინისტრაცია არჩევნების მაღალ დონეზე და საერთაშორისო სტანდარტების დაცვით ჩასატარებლად სრული დატვირთვით მუშაობს. განსაკუთრებული მნიშვნელობა აქვს საოლქო და საუბნო საარჩევნო კომისიების წევრების მხრიდან საარჩევნო კანონმდებლობისა და საარჩევნო ადმინისტრაციის მოხელეთა ეთიკის კოდექსის დაცვას, რომელსაც ყველა დონის საარჩევნო კომისიების წევრებმა მოაწერეს ხელი. როგორც საოლქო, ისე საუბნო საარჩევნო კომისიების წევრებმა უნდა დაიცვან საქართველოს საარჩევნო ადმინისტრაციის მოხელეთა ეთიკის კოდექსი, იყვნენ სამართლიანი და მიუკერძოებელი, თავი აარიდონ ისეთ ქმედებას, რომელიც მიმართული იქნება მოხელის და საარჩევნო ადმინისტრაციის დისკრედიტაციისკენ. აქვე კიდევ ერთხელ შევახსენებ მათ, რომ საარჩევნო კანონმდებლობის თანახმად, კომისიის წევრს წინასაარჩევნო აგიტაციაში მონაწილეობა ეკრძალება", — აცხადებს კალანდარიშვილი.

ის, ასევე, იმ ტრენინგების მნიშვნელობაზე საუბრობს, რომელსაც ცესკო და სწავლების ცენტრი საუბნო საარჩევნო კომისიებისთვის ატარებენ.

"თქვენი ამ სწავლებაში აქტიური ჩართულობა კენჭისყრის პროცესში გამორიცხავს ყველაზე მცირე ხარვეზსაც კი და ხმის მიცემისას ამომრჩევლების მაღალ დონეზე მომსახურებას უზრუნველყოფს. ვისარგებლებ შემთხვევით და კიდევ ერთხელ მოგიწოდებთ ყველა დონის საარჩევნო კომისიის წევრებს, ჯანმრთელობის უსაფრთხოებასთან დაკავშირებული დადგენილი პროტოკოლის დაცვისა და ვაქცინაციისკენ", — ამბობს ცესკოს თავმჯდომარე.

მუნიციპალიტეტის ორგანოთა არჩევნებამდე 26 დღე რჩება. ადგილობრივი თვითმმართველობის არჩევნები საქართველოში 2 ოქტომბერს გაიმართება.