ობობები წელიწადში 800 მილიონ ტონა საკვებს ჭამენ, რაც მათ მსოფლიოში ერთ-ერთ ყველაზე ხარბ მტაცებლებად აქცევს.

ობობების მსხვერპლები უმეტესობად მწერები ხდებიან, თუმცა, უდიდესი ტროპიკული სახეობები ხანდახან ისეთ ხერხემლიანებსაც ჭამენ, როგორებიც არიან: ბაყაყები, თევზები და პატარა ძუძუმწოვრებიც კი.

მსოფლიოში ობობის 45 000-ზე მეტი სახეობა არსებობს. შვეიცარელი და შვედი მეცნიერების გამოთვლებით, ერთად ისინი 400-800 მილიონ ტონა მსხვერპლს ხოცავენ წლიურად.

შედარებისთვის, დედამიწაზე მცხოვრები ყველა ადამიანი დაახლოებით 400 მილიონ ტონა ხორცსა და თევზს მოიხმარს ყოველწლიურად, გაერთიანებული ერების კვებისა და სამეურნეო ორგანიზაციის მიხედვით.

ობობების მადა ვეშაპების მადასაც კი აჭარბებს, რომლებიც 280-500 მილიონ ტონა საჭმელს იღებენ ყოველ წელს.

"ჩვენმა გამოთვლებმა გვაჩვენა პირველად გლობალურ მასშტაბზე, რომ ობობები მწერების უმთავრესი ბუნებრივი მტრები არიან. მწერიჭამია ცხოველებთან ერთად, როგორებიც არიან ჭიანჭველები და ჩიტები, ისინი შესამჩნევად ამცირებენ მწერების პოპულაციის სიმჭიდროვეს",- ამბობს მარტინ ნაიფელერი, ბაზელის უნივერსიტეტიდან, შვეიცარია.

"აქედან გამომდინარე, ობობებს უმთავრესი წვლილი მიუძღვით ბუნების ეკოლოგოიური ბალანსის შენარჩუნებაში", - აღნიშნავს ნაიფელერი.

ობობის მსხვერპლების 90%-ს მწერები და ბოლოფეხიანები შეადგენენ. მეცნიერებმა აჩვენეს, რომ ობობები ბევრად უფრო მეტ მწერს ტყეებსა და მდელოებში ხოცავენ, ვიდრე სხვა საცხოვრებელ გარემოში.

მკვლევართა თქმით, მათი ზემოქმედება სამეურნეო არეალებში დაბალი იყო, რადგან ფერმერებს დიდად არ მოსწონთ ობობები.