პარტია ლელოს ლიდერის, მამუკა ხაზარაძის განცხადებით, ნაციონალური მოძრაობის გადაწყვეტილება, შეუერთდეს მიშელის დოკუმენტს, მათ პოზიციებს რეფერენდუმად ქცეულ ადგილობრივ არჩევნებში მნიშვნელოვნად აძლიერებს. ამის შესახებ იგი თავის Facebook გვერდზე წერს.

"ლელომ შარლ მიშელის შეთანხმებით ქვეყნის უმძიმესი კრიზისიდან გამოყვანის გეგმას მოაწერა ხელი. სამწუხაროდ, თავიდანვე ვერ მოხერხდა ყველა პროევროპული პოლიტიკური ძალის გაერთიანება ამ შეთანხმებაში. კარგია, რომ დღეისათვის ეს პრობლემა დაძლეულია და არსებობს დიდი კონსენსუსი შარლ მიშელის შეთანხმების მთავარი ნაწილის — ვადამდელი არჩევნების მიღწევის 43%-იანი ფორმულის თაობაზე.

ნაციონალური მოძრაობის დღევანდელი გადაწყვეტილება, ოფიციალურადაც შეერთებოდა ამ დოკუმენტს, მნიშვნელოვნად აძლიერებს ჩვენს პოზიციებს რეფერენდუმად ქცეულ ადგილობრივ არჩევნებში", — წერს ხაზარაძე.

მისივე თქმით, "ოცნებამ" შეთანხმებიდან თავის დაძვრენაზე "ფუჭ ოცნებას" თავი უნდა დაანებოს და ქვეყნის ევროპული არჩევანის დამაზიანებელი ქმედებები შეწყვიტოს, რადგან ეს მაინც არ გამოუვა.

ნიკა მელიას განცხადებით, ნაციონალური მოძრაობა შარლ მიშელის ხელშეკრულებას ხელს მოაწერს. მისივე თქმით, ევროკავშირის მაკროფინანსური დახმარებაზე უარის თქმა და ქართული ოცნების ბოლო განცხადებები არის ღია პოლიტიკური განაცხადი საგარეო პოლიტიკური კურსის ცვლილებაზე და სწორედ ეს გახდა მათთვის ბიძგი, რომ შეთანხმებისთვის ხელი მოეწერათ. მელიამ აღნიშნა, რომ ეს ნაბიჯი კიდევ უფრო დააახლოებს და შეკრავს ყველას, ვისთვისაც ძვირფასია საქართველოს ევროპული მომავალი.