დე-ფაქტო აფხაზეთის სამინისტრომ უპასუხა საქართველოს საგარეო საქმეთა სამინისტროს განცხადებას, სადაც აფხაზეთში 12 მარტს გამართული არჩევნები "უკანონოდ" და "ეთნიკური წმენდის ლეგიტიმაციად" არის შეფასებული.

როგორც დე-ფაქტო რესპუბლიკის საგარეო უწყება აცხადებს, "როგორც არ უნდა იმეცადინოს საქართველოს საგარეო საქმეთა სამინისტრომ პროპაგანდისტულ რიტორიკაში, ეს ვერანაირ გავლენას ვერ მოახდენს სუვერენულ აფხაზეთში მიმდინარე პოლიტიკურ პროცესებზე".

"ნებისმიერი მიუკერძოებელი დამკვირვებლისთვის ცხადია, რომ აფხაზეთის რესპუბლიკა წარმოადგენს ჩამოყალიბებულ სუვერენულ სახელმწიფოს, ქვეყნისთვის აუცილებელი ყველა სახელმწიფო ინსტიტუტით, რომელიც ცხოვრობს თავისი კანონებით და ურთიერთობების დამყარებით იმ სახელმწიფოებთან, რომლებიც წარმოადგენენ სოხუმისთვის პრიორიტეტს. თუ საქართველოში ამის შემჩნევა არ უნდათ, ეს საქართველოს ხელისუფლების პრობლემაა. მათ შეუძლიათ გააგრძელონ ცხოვრება გამოგონილ სამყაროში, თუმცა ნაკლებად სავარაუდოა, ამან ხელი შეუწყოს მსოფლიოში მიმდინარე პოლიტიკური პროცესების ადეკვატურ აღქმას".

საქართველოს საგარეო საქმეთა სამინისტრომ დე-ფაქტო აფხაზეთში ჩატარებულ არჩევნებთან დაკავშირებით მიმართა საერთაშორისო თანამეგობრობას და მოუწოდა, ჯეროვნად შეაფასოს აფხაზეთის რეგიონში უკანონოდ ჩატარებული ე.წ. საპარლამენტო არჩევნები. მან ასევე მოუწოდა რუსეთის ფედერაციას, პატივი სცეს საერთაშორისო სამართლის ფუნდამენტურ ნორმებსა და პრინციპებს.