პარტია საქართველოსთვის პოლიტიკური საბჭოს წევრის, ანა ბუჩუკურის განცხადებით, ქართული ოცნება საზოგადოებას "მოდელირებულ რეალობას" სთავაზობს. ასე ეხმაურება დეპუტატი მმართველი პარტიის მიერ ჩატარებულ კვლევას, რომლის მიხედვითაც თბილისის მერობის არჩევნებში კახა კალაძე გაიმარჯვებს.

"მოდელირებული რეალობის შეთავაზება ხდება საზოგადოებისთვის [...] ჩვენთვის, რა თქმა უნდა, ყველაზე სანდო და მყარი კვლევა არის ჩვენი ყოველდღიური კომუნიკაცია ჩვენს ხალხთან", — განაცხადა ანა ბუჩუკურმა.

დღეს, ქართული ოცნების ოფისში სპეციალური ბრიფინგი გაიმართა, სადაც საზოგადოებას მათ მიერ ჩატარებული კვლევის შედეგები გააცნეს. კვლევის მიხედვით კახა კალაძის რეიტინგი 60,1%-ია, ნიკა მელიას კი — 29,2. ამავე კვლევის მიხედვით, დედაქალაქის საკრებულოს 40 მანდატიდან 22-ს თავად მმართველი პარტია მიიღებს, 12-ს ნაციონალური მოძრაობა და 2-2 მანდატს პარტიები — მოქალაქეები, საქართველოსთვის და გირჩი — მეტი თავისუფლება.

ადგილობრივი თვითმმართველობის არჩევნები 2 ოქტომბერს გაიმართება.