პრემიერმინისტრი, ირაკლი ღარიბაშვილი აცხადებს, რომ ფოთი ახალგაზრდა, წესიერ, გაურყვნელ ადამიანს ირჩევს და ოპოზიციის მერობის კანდიდატს, გიგი უგულავას შეურაცხმყოფელად მოიხსენიებს.

"ასევე, მინდა გითხრათ ძალიან მოკლედ, თუ ვინ უპირისპირდება ღირსეულ კანდიდატს, ახალგაზრდობას, მომავალ თაობას, განვითარებას. უპირისპირდება, ალბათ, ყველაზე, მე ვიტყოდი ასე, პოლიტიკოსისთვის შეუფერებელი, ნათქვამია, რომ ძალაუფლება რყვნის ადამიანს და პოლიტიკაში, ჩვენ რაც გვინახავს ბოლო წლების განმავლობაში, მრავლად ვნახეთ ასეთი გარყვნილი პოლიტიკოსები. მე არ მოვერიდები ამის თქმას, ვინაიდან ვიცით, რომ დღეს ჩვენ კიდევ ვდგავართ არჩევანის წინაშე — ფოთი ირჩევს ახალგაზრდა, წესიერ, გაურყვნელ ადამიანს, რომელიც მოემსახურება თავის ფოთსა და თავის ფოთელებს და მეორე მხრივ, არის კორუმპირებული, მართლაც დეგრადირებული პოლიტიკოსი, მარგინალიზებული გიგი უგულავა", — ამბობს პრემიერმინისტრი.

19 აგვისტოს ცნობილი გახდა, რომ ფოთში ოპოზიციის კანდიდატი გიგი უგულავა იქნებოდა. აქამდე ვრცელდებოდა ინფორმაცია, რომ კანდიდატებად თინა ბოკუჩავა და ბექა ბასილაია განიხილებოდნენ. გიგი უგულავა თვითმმართველობის არჩევნებზე ნაციონალური მოძრაობის სახელით წარსდგება, მიუხედავად იმისა, რომ პარტიის წევრი არ არის.