დაავადებათა კონტროლის ეროვნული ცენტრის დირექტორი, ამირან გამყრელიძე აცხადებს, რომ ის ორმაგ სტანდარტს არასდროს თამაშობს და არ დაუმალავს, რომ ქართულ ოცნებას პატივს სცემს. ამის შესახებ მან ფორმულას ეთერში ისაუბრა.

გამყრელიძემ დღესაც უარი თქვა კონკრეტულ განცხადებებზე, რადგან მისი თქმით, პოლიტიკურ შეფასებებს არ აკეთებს. მიუხედავად ამისა, ჟურნალისტმა მას შეახსენა, რომ ის პოლიტიკის ნაწილია, რადგან არაერთხელ ყოფილა ქართულ ოცნებასთან დაკავშირებული, მათ შორის, დასწრებია მათი კანდიდატების წარდგენასაც.

"ვერ დაგეთანხმებით, ორმაგ სტანდარტს მე არასოდეს არ ვთამაშობ, არაფერი მე არ დამიმალავს, რომ ქართულ ოცნებას პატივს ვცემ. ქართული ოცნების პირობებში დაავადებათა კონტროლის ცენტრი, რომელსაც მე უკვე 8-9 წელია ვხელმძღვანელობ, გახდა ქვეყნის ერთ-ერთი სერიოზული და მოწინავე დაწესებულება. დაუბრუნდა მას ლუგარი, რომელიც წართმეული იყო. დაავადებათა კონტროლის ცენტრი გახლავთ სწორედ წამყვანი, მან თავის დროზე ქვეყანაში დაუდო საფუძველი B ჰეპეტატის ვაქცინაციას.

ბევრი სხვა პრობლემა, რომელიც გადაწყდა. რა არის გასაკვირი ამაში, რომ მისი დირექტორი პატივს სცემდეს საზოგადოებას, ვინც მიეხმარა და მხარში დაუდგა, იმ დროინდელი, ამ დროინდელი სამინისტრო, ხელმძღვანელობა, დაფინანსება და კიდევ ბევრი სხვა რამე. ეს, რა, პოლიტიკური პროცესია? დაავადებათა კონტროლის ცენტრი არის სახელმწიფო დაწესებულება, მაგრამ ეს სახელმწიფო დაწესებულება იქცა დღეს ერთ-ერთ წამყვან დაწესებულებად", — ამბობს ის.

მიუხედავად იმისა, რომ პანდემიის დაწყებიდან გამყრელიძე მოსახლეობას მოუწოდებს, ქორწილებისა და წვეულებებისგან თავი შეიკავონ, მან უარი თქვა, შეეფასებინა პრემიერმინისტრის, ირაკლი ღარიბაშვილის მიერ ქეიფში მონაწილეობა. გამყრელიძემ ამასთან დაკავშირებით კომენტარის გაკეთებისგან თავი შეიკავა და აღნიშნა, რომ პოლიტიკურ შეფასებებს არ აკეთებს. გამყრელიძემ არ ისაუბრა არც არჩევნების გადადების საკითხზე და ამასაც "პოლიტიკური" უწოდა და აღნიშნა, რომ ამ საკითხზე თავის რეკომენდაციას საკოორდინაციო საბჭოზე გააჟღერებს.