ეროვნული ბანკის ინფორმაციით, მიმდინარე წლის ივლისში, ივნისთან შედარებით, კომერციული ბანკების მიერ გაცემული სესხების მოცულობა (ბანკთაშორისი სესხების გარდა) 382,83 მილიონი ლარით გაიზარდა და პირველი აგვისტოსთვის 39,6 მილიარდი ლარი შეადგინა.

სებ-ი სესხების სტატისტიკის დათვლისას ბანკების მიერ სხვადასხვა ვალუტაში გაცემულ კრედიტებს ლარში აკონვერტირებს. შესაბამისად, სესხების მიმდინარე ტენდენციების გამოვლენისას გასათვალისწინებელია ეროვნული ვალუტის გაცვლითი კურისის ფაქტორი.

ივლისში, ივნისთან შედარებით, ბანკების მიერ გაცემული სესხების მოცულობა 0,98%-ით გაიზარდა, თუმცა, გაცვლითი კურსის ეფექტის გარეშე ზრდა 1,59%-ია. ივლისში, ივნისთან შედარებით, ლარი დოლართან მიმართებით, საშუალოდ, 1,3%-ით გამყარდა.

ამავე პერიოდში ეროვნული ვალუტით გაცემული სესხების მოცულობა 398,21 მილიონი ლარით (2,15%-ით) გაიზარდა, ხოლო უცხოური ვალუტით გაცემული სესხების მოცულობა 15,38 მილიონი ლარით (0,07%-ით) შემცირდა. თუ ამ პერიოდში ლარის მცირედით გამყარების ფაქტორს გამოვრიცხავთ, უცხოური ვალუტით გაცემული სესხები 1,08%-ით გაიზრდებოდა.

რეზიდენტი იურიდიული პირებისათვის 2021 წლის ივლისის ბოლოს, კომერციულ ბანკებს ეროვნული ვალუტით გაცემული ჰქონდათ 5,98 მილიარდი ლარის (წინა თვესთან შედარებით 1,56%-ით მეტი), ხოლო უცხოური ვალუტით 12,90 მილიარდი ლარის (წინა თვესთან შედარებით 0,11%-ით ნაკლები) მოცულობის სესხი.

2021 წლის ივლისის განმავლობაში 1,46%-ით, ანუ 285,63 მილიონი ლარით გაიზარდა რეზიდენტი შინამეურნეობების სექტორის დაკრედიტების მოცულობა და მიმდინარე წლის პირველი აგვისტოსათვის 19,88 მლრდ ლარი შეადგინა.

მიმდინარე წლის პირველი აგვისტოსათვის, ლარში გაცემული სესხების წილმა 47,7% შეადგინა. ეს მონაცემი გასული თვის იმავე პერიოდთან შედარებით 0,55 პროცენტული პუნქტით არის გაზრდილი.