ავღანეთის პრეზიდენტმა, აშრაფ ღანიმ არაბთა გაერთიანებულ საამიროებიდან ვიდეომიმართვა გაავრცელა, სადაც ტექსტს კითხულობს და ისევ აღნიშნავს, რომ ქვეყანა სისხლისღვრის ასარიდებლად დატოვა. იგივეს ამბობდა ის წერილშიც, რომელიც ქვეყნიდან გაქცევის შემდეგ ფეისბუქზე დაპოსტა.

"მივმართავ ერს ქვეყანაში ბოლო დროს განვითარებულ მოვლენებთან დაკავშირებით" — აწერს ღანის ვიდეოს, რომელიც ქვეყნიდან გაქცევიდან მესამე დღეს გაავრცელა და რომელშიც დაახლოებით 10 წუთი საუბრობს.

ვიდეოს შინაარსი ძირითადად იმის ახსნის მცდელობაა, რატომ დატოვა მან მოქალაქეები და ქვეყანა თალიბანთან მარტო. ღანი ამბობს იმასაც, რომ დაცვის სამსახურმა წასვლა აიძულა, რადგან არსებობდა რეალური საფრთხე იმისა, რომ მას შეიპყრობდნენ. მისი თქმით, როცა თალიბებმა სასახლე აიღეს, მას ოთახ-ოთახ ეძებდნენ.

"ჩემი მისია იყო, რომ ძალაუფლებისადმი სწრაფვის გამო ქაბული არ გამხდარიყო მეორე იემენი ან სირია", — ამბობს ის.

მისივე მტკიცებით, ინფორმაცია თითქოს ის ჩემოდნით სავსე ფულით, 169 მილიონი დოლარით გაიქცა ქვეყნიდან სრულიად უსაფუძვლოა. ღანის თქმით, ამის გარკვევა შეუძლიათ მებაჯეებისგანაც. ყოფილი პრეზიდენტის მტკიცებით, ისე წამოვიდა, რომ იმის საშუალებაც არ მისცეს, სანდლები გაეხადა და სხვა ფეხსაცმელი ჩაეცვა, რადგან თალიბანი სწრაფად აუხლოვდებოდათ.

საამიეროებში მყოფი ღანი ამბობს, რომ ჰქონდა კონტაქტი ოფიციალურ პირებთან, რათა შეეთავაზებინა თავისი ძალისხმევა ავღანელებისთვის სამართლიანობის უზრუნველსაყოფად.

აშრაფ ღანი არაბთა ოჯახთან ერთად გაერთიანებულ საამიროებშია. საამიროებში ამბობენ, რომ ის ჰუმანიტარული მიზნებიდან გამომდინარე მიიღეს.

თალიბანმა 15-16 აგვისტოს ავღანეთის დედაქალაქი ქაბულიც აიღო და განაცხადა, რომ "ომი დასრულდა". 15 აგვისტოს, მას შემდეგ, რაც თალიბანი დედაქალაქს მიადგა, ქვეყანა პრეზიდენტმა და მთავრობის რამდენიმე წევრმა დატოვა. მებრძოლები პრეზიდენტის სასახლეში შევიდნენ და ახლა ადმინისტრაციას ისინი აკონტროლებენ. თუმცა, ხელისუფლების რამდენიმე წარმომადგენელი ქვეყანაში ამ დრომდე ქვეყანაში რჩება. მათ შორის არის ავღანეთის ვიცე-პრეზიდენტი ამრულა სალეჰი, რომელიც მოსახლეობას თალიბანის წინააღმდეგ ბრძოლისკენ მოუწოდებს.

თავდაპირველად თალიბები ამბობდნენ, რომ ქალაქის ბრძოლით აღება და სისხლისღვრა არ სურთ, მხოლოდ შესასვლელთან გამაგრდებიან და ხელისუფლების მშვიდობიანად გადაბარებისთვის მოემზადებიან, თუმცა მოგვიანებით რამდენიმე დასახლებაში შევიდნენ — ქალაქში ისმოდა სროლის ხმა, არიან დაშავებულები. თალიბების მტკიცებით, ეს იმიტომ გააკეთეს, რომ პოლიციამ და მთავრობამ ქალაქი დატოვა და "წესრიგის უზრუნველყოფა" იყო საჭირო.

პრობლემურ საკითხად იქცა დიპლომატიური კორპუსის წარმომადგენლებისა და უცხო ქვეყნის მოქალაქეების უსაფრთხოდ გაყვანა. აშშ-მ საელჩოს თანამშრომლების ევაკუაცია თალიბების მისვლისთანავე დაიწყო. ისინი ვერტმფრენით გადაიყვანეს ქაბულის აეროპორტში. ამავე აეროპორტიდან ახორციელებდნენ ევაკუაციას სხვა ქვეყნებიც. რამდენიმე საათში აეროპორტს ათასობით ადამიანი მიადგა, რომელსაც ავღანეთიდან გაქცევა სურდა — ისინი თვითმფრინავში შეჭრას ცდილობდნენ.

ქვეყნების უმრავლესობამ ქაბულში საელჩოები დახურა და დიპლომატიური კორპუსის გაყვანას ცდილობს. გამონაკლისი რუსეთი, ჩინეთი და ირანია, რომლებიც ამბობენ, რომ მუშაობას აგრძელებენ.