მიმდინარე წლის ივლისში ქუთაისის აეროპორტით 42 332 მგზავრმა, ხოლო პანდემიამდე, 2019 წლის იმავე თვეში 84 728 ადამიანმა ისარგებლა. როგორც სტატისტიკა აჩვენებს, 2019 წლის ივლისში ქუთაისის აეროპორტი 2-ჯერ მეტ მგზავრს ემსახურებოდა, ანუ მგზავრთა ნაკადის რაოდენობა 2021 წელში 50%-ით არის აღდგენილი.

რაც შეეხება ავიაკომპანიების მიერ განხორციელებულ ფრენებს, ქუთაისის აეროპორტში მიმდინარე წლის ივლისში სულ 186 რეისი შესრულდა, ხოლო 2019 წლის იმავე თვეში 267. ამ შემთხვევაში აღდგენის დინამიკა 70%-ია.

საქართველოს აეროპორტების გაერთიანებაში მგზავრთა და რეისების აღდგენის დინამიკას დადებითად აფასებენ და აქცენტს ავიაკომპანიებთან ახალი მიმართულებების დამატებაზე აკეთებენ.

"ჩვენ მუდმივად ვმუშაობთ ავიაკომპანიებთან ახალი მიმართულებების დამატებისა და სიხშირეების ზრდის კუთხით. გაფართოების შემდეგ, ქუთაისის განახლებულ საერთაშორისო აეროპორტში დაგვიბრუნდა ჩვენი სტრატეგიული პარტნიორი Wizz Air, რომელიც პირდაპირ რეგულარულ ავიარეისებს ამ ეტაპზე, ევროპის 14 მიმართულებით ასრულებს. ასევე, ქუთაისის აეროპორტში შემოვიყვანეთ საქართველოს ავიაბაზრისთვის სრულიად ახალი ავიაკომპანია, ყაზახური დაბალბიუჯეტური FlyArystan და პირდაპირ რეგულარულ რეისებს ქუთაისიდან აზიის 4 მიმართულებით, ახლა კვირაში 12 სიხშირით ასრულებს. ასევე, აგვისტოდან, თბილისისა და ბათუმის აეროპორტების შემდეგ, ქუთაისიდან ოპერირება დაიწყო Belavia-მ", —განაცხადა საქართველოს აეროპორტების გაერთიანების დირექტორმა თამარ არჩუაძემ.

საქართველოს აეროპორტების გაერთიანების ინფორმაციით, ამ ეტაპისთვის, ქუთაისის საერთაშორისო აეროპორტში 3 ავიაკომპანია 11 ქვეყნის 19 მიმართულებით ოპერირებს. მათივე ცნობით, აგვისტოს თვეში ქუთაისის საერთაშორისო აეროპორტიდან ევროპის მიმართულებით 112 რეგულარული რეისი, აზიის მიმართულებით კი 54 რეგულარული რეისი შესრულდება.

ივლისში საქართველოში 230,9 ათასი უცხოური ვიზიტი განხორციელდა, რაც პანდემიური პერიოდის განმავლობაში ყველაზე მაღალი მაჩვენებელია. ამავე თვეში უცხოური ვიზიტების რაოდენობის წლიური ზრდა 403,7% იყო, თუმცა უნდა აღინიშნოს, რომ ტურიზმის მიმდინარე მაჩვენებლები ჯერ კიდევ მნიშვნელოვნად ჩამორჩება 2019 წლის მონაცემებს: 2021 წლის ივლისში, 2019 წლის იმავე თვესთან შედარებით, უცხოური ვიზიტების რაოდენობა 73,8%-ით არის შემცირებული.

სტატისტიკის მიხედვით, ვიზიტების ძირითადი ნაწილი, 60% საჰაერო გზით, 39% — სახმელეთო, 0,8% — სარკინიგზო, ხოლო 0,2% საზღვაო გზით განხორციელდა.

აღსანიშნავია, რომ ბოლო თვეების განმავლობაში როგორც ვიზიტების, ასევე ამ ვიზიტებიდან მიღებული შემოსავლების მატება შეინიშნება, თუმცა არსებული სტატისტიკით, ტურიზმის მაჩვენებლები პანდემიამდელ მონაცემებს მნიშვნელოვნად ჩამორჩება.