ევროკავშირის, საერთაშორისო ორგანიზაციების და იმ ქვეყნების დროშის დაზიანებაზე, რომელთანაც საქართველოს დიპლომატიური ურთიერთობები აქვს, ფულადი სანქციები წესდება. ეს ეხება იმ დროშებს, რომლებიც ადმინისტრაციულ შენობებზე და შენობებთან არის აღმართული. სათანადო კანონპროექტი მას შემდეგ მომზადდა, რაც 5-6 ივლისს ძალადობრივი კონტრაქციის მონაწილეებმა პარლამენტის წინ აღმართული ევროკავშირის დროშა ორჯერ ჩამოხსნეს და დახიეს.

მიუხედავად იმისა, რომ მაშინ ამ ფაქტს საზოგადოების დიდი ნაწილის აღშფოთება მოჰყვა, ხელისუფლებამ შესაბამისი რეაგირების არარსებობა საკანონმდებლო ხარვეზით ახსნა — ქართულ კანონმდებლობაში არ არსებობს ჩანაწერი, როგორ უნდა დაისაჯოს უცხო ქვეყნის დროშის და სახელმწიფო სიმბოლოების შეურაცხყოფა. მოქმედი კანონმდებლობით, სახელმწიფო გერბის ან დროშის შებღალვა ისჯება სისხლის სამართლის კოდექსით (მუხლი 343). ამ დანაშაულისთვის განსაზღვრულია ან შინაპატიმრობა ვადით ექვსი თვიდან ორ წლამდე, ან თავისუფლების აღკვეთით ორ წლამდე ვადით.

ვანდალური აქტის შემდეგ, კუჭავამ ჩამოგლეჯილი ევროკავშირის დროშა ხელახლა დაკიდა და განაცხადა, რომ კანონპროექტს შეიმუშავებდნენ. მიუხედავად იმისა, რომ ოპოზიციის ნაწილი სიმბოლოების შეურაცხმყოფელთა დასჯის იდეას არ იზიარებს, საპარლამენტო ოპოზიციის მეორე ნაწილი პროცესში ჩაერთო და კანონპროქტის ინიციატორები, კუჭავასთან ერთად, ალექსანდრე ელისაშვილი, ფრიდონ ინჯია, ხათუნა სამნიძე და ბადრი ჯაფარიძე, უმრავლესობიდან კი ნიკოლოზ სამხარაძე არიან. ავტორი თავად კუჭავაა.

კანონპროექტით, ადმინისტრაციული პასუხისმგებლობა წესდება ევროკავშირის, ჩრდილოატლანტიკური ხელშეკრულების ორგანიზაციის ოფიციალური სიმბოლოს, ასევე იმ სხვა საერთაშორისო ორგანიზაციის ოფიციალური სიმბოლოს შებღალვისთვის, რომლის წევრიც საქართველოა. ასევე, პირს ადმინისტრაციული პასუხისმგებლობა იმ სახელმწიფოს ეროვნული სიმბოლოს შებღალვისთვის დაეკისრება, რომელთანაც საქართველოს დიპლომატიური ურთიერთობა აქვს და რომელიც აღმართულია ან გამოფენილია საჯარო დაწესებულებებზე, საჯარო დაწესებულების წინ ან საჯარო დაწესებულების შენობაში.

შესაბამისად, ადმინისტრაციულ სამართალდარღვევათა კოდექსის 174-ე მუხლს, რომელიც თვითნებობას გულისხმობს, ახალი 18 პრიმა პუნქტი დაემატება, რომლის თანახმად, აღნიშნული ქმედება გამოიწვევს ფიზიკური პირის 1 000 ლარით დაჯარიმებას. იგივე ქმედების განმეორებით ჩადენა გამოიწვევს ფიზიკური პირის დაჯარიმებას 2 000 ლარით ან ფიზიკური პირის ადმინისტრაციულ პატიმრობას, 15 დღემდე ვადით.

პარლამენტი კანონპროექტის განხილვას იწყებს. თუმცა, მისი დამტკიცება დიდი ალბათობით საშემოდგომო სესიაზე მოხდება. ამასთან, დამტკიცების შემდეგ კანონი 15 დღეში უნდა ამოქმედდეს და მას უკუძალა არ ექნება, რაც იმას ნიშნავს, რომ ძალადობრივი კონტრაქციის მონაწილეები, რომლებმაც ევროკავშირის დროშა ორჯერ ჩამოხიეს, ამისთვის ვერ დაისჯებიან.