საქართველოს პრემიერმინისტრის, ირაკლი ღარიბაშვილის თქმით, ქვეყნის ეკონომიკის გაჯანსაღება "შთამბეჭდავი ტემპებით" მიმდინარეობს. ღარიბაშვილმა ისაუბრა სააგენტო Fitch-ის რეიტინგზე, რომლის მიხედვითაც, საქართველოს რეიტინგის პერსპექტივა სტაბილურამდე გაუმჯობესდა.

"6 აგვისტოს გამოქვეყნდა ერთ-ერთი ავტორიტეტული სარეიტინგო კომპანია, სააგენტო Fitch-ის რეიტინგი, რომლის მიხედვითაც ჩვენს ქვეყანას, შეუნარჩუნდა, ერთი მხრივ, საქართველოს სუვერენული საკრედიტო რეიტინგი BB დონეზე და რეიტინგის პერსპექტივა ნეგატიურიდან სტაბილურობამდე გაუმჯობესდა.

ამ გადაწყვეტილებით ჩვენი ქვეყანა, პრაქტიკულად, დაუბრუნდა პანდემიამდე მაჩვენებელს. რეიტინგის პერსპექტივის გაუმჯობესების მთავარ მიზეზად სააგენტო ასახელებს მოსალოდნელზე სწრაფ ეკონომიკურ აღდგენას, ძლიერ და დამაჯერებელ მაკროეკონომიკურ პოლიტიკას და მაღალ საერთაშორისო მხარდაჭერას", — განაცხადა ღარიბაშვილმა.

საერთაშორისო სარეიტინგო კომპანიამ Fitch Ratings-მა საქართველოს პერსპექტივა ნეგატიურიდან სტაბილურზე შეცვალა, ხოლო სუვერენული რეიტინგი BB დონეზე შეინარჩუნა.