ევროპული საქართველოს პოლიტსაბჭოს თავმჯდომარე, გიგი წერეთელი აცხადებს, რომ ბრძოლა თავისუფალი და სუვერენული სახელმწიფოს შექმნისკენ ჯერ დასრულებული არაა. მისი თქმით, ქვეყნის ოკუპაცია ყოველდღე გრძელდება.

"დღეს ძალიან მძიმე დღეა. ჩვენ ვიხსენებთ ამ ურთულესს პერიოდს საქართველოს ისტორიაში, საქართველოს დიდ განსაცდელსა და დიდ გმირობას, რომელიც ჩვენ ვნახეთ ჩვენი თანამემამულეებისგან. ძალიან ბევრი ახალგაზრდა დაიღუპა და მათ ხსოვნას პატივს მივაგებ დღეს.

რა თქმა უნდა, ეს ბრძოლა დასრულებული არ არის. ჩვენ ყოველდღე ვხედავთ, ყოველდღე აღვიქვამთ, ყოველდღე ვუყურებთ როგორ გრძელდება ჩვენი ქვეყნის ოკუპაცია. ამიტომ, ერთადერთი საშუალება და გამოსავალი არის ის, რომ ჩვენმა საზოგადოებამ და სახელმწიფომ არ შეაჩეროს ეს ბრძოლა მანამ, სანამ საქართველო არ იქნება თავისუფალი და სუვერენული სახელმწიფო", — განაცხადა გიგი წერეთელმა.

2008 წლის ომის დაწყებიდან 13 წელი გავიდა, თუმცა რუსეთი დღემდე არღვევს სუვერენული სახელმწიფოს საზღვრებს, იტაცებს ხალხს და ცივი ომის პირობებში აცხოვრებს საქართველოს.

2021 წლის 21 იანვარს ადამიანის უფლებათა ევროპული სასამართლომ საქართველოს ყველა ძირითადი სარჩელი დააკმაყოფილა. კერძოდ, სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა. ასევე, სასამართლოს დიდმა პალატამ, კონვენციის მე-4 მუხლის შესაბამისად, რაც სიცოცხლის უფლებას გულისხმობს, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

აგვისტოს ომმა 400-ზე მეტი ადამიანის სიცოცხლე იმსხვერპლა, მათ შორი 170 სამხედრო მოსამსახურე იყო. ჯანდაცვის სამინისტროს მონაცემებით, ომში დაიჭრა/დაშავდა 2 232 პირი, მათგან 1 045 სამხედრო მოსამსახურე.