კულტურის მინისტრი, თეა წულუკიანი 5 აგვისტოს მუზეუმისთვის გამართულ აქციებს "ჩაფლავებულს" უწოდებს. გუშინ ხელოვნების მუზეუმის დასაცავად აქციები გაიმართა, სადაც აქტივისტებმა მიმდინარე პროცესები გააპროტესტეს.

"ჩვენ გუშინ ვნახეთ ჩაფლავებული აქციები. ვნახეთ, რომ ვერავითარი სარწმუნო არგუმენტი საზოგადოებას ამ ადამიანებმა ვერ მიაწოდეს. სამწუხაროა, რომ ნებისმიერი ქვეყნისთვის საჭირბოროტო თემას კვლავ არ დაგიდევს პოლიტიკური ოპოზიცია და ამ თემის პოლიტიზირებასაც, რაც მთავარია, ძალიან არასწორი და მახინჯი ფორმით ცდილობს", — განაცხადა წულუკიანმა.

მისივე თქმით, მომავალში თუ აქციის მონაწილეებს ჯაჭვის შექმნა დასჭირდებათ, "დაეხმარება" და რგოლებად იმუშავებს.

"თუ მომავალში დააპირებენ ჯაჭვის შექმნას, ჩვენ შეგვიძლია მათ დავეხმაროთ, ჯაჭვის რგოლებად ვიმუშაოთ, რაკი ჯაჭვის შექმნაც ვერ გახდა გუშინ შესაძლებელი, მათდა სამწუხაროდ", — აცხადებს ის.

მინისტრმა ისაუბრა მუზეუმის მდგომარეობაზეც და კიდევ ერთხელ გაიმეორა, რომ აქ როგორც სახელმწიფოს, ასევე, სამინისტროს პოზიცია ურყევია. აქვე გვარწმუნებს, რომ სექტემბრის ბოლოს ინვენტარიზაციის შედეგებს გვაჩვენებენ.

"მე ხანდახან მიჩნდება განცდა, რომ იმ თანამშრომლებს, რომლებიც ძალიან ბევრს ყვირიან, აქვთ გარკვეული შიშები, იმიტომ, რომ ინვენტარიზაცია არ არის მარტივი პროცესი. სექტემბრის ბოლოს ჩვენ ამ ინვენტარიზაციის შედეგებს წარმოგიდგენთ თქვენ, საზოგადოებას, სწორედ ეს არის ჩვენი გამჭვირვალობა და გამჭვირვალობის მაგალითი. ეს მუზეუმი, ათეული წლები თუ არა, ყოველ შემთხვევაში, ბატონი დავით ლორთქიფანიძის მმართველობის პირობებში იყო გამოწვევა და დღესაც არის. ჩვენ ვმუშაობთ ერთად იმისთვის, რომ ეს გამოწვევა დავძლიოთ", — განაცხადა მან.

წულუკიანის თქმით, მუზეუმის აღდგენას რამდენიმე ათეული მილიონი ლარი დაჯდება, თუმცა დისკუსია უკვე მიდის მთავრობასთან და სამომავლო ბიუჯეტში ეს უკვე ასახული იქნება. გარდა ამისა, მინისტრის თქმით, აღდგენის პროექტზე უკვე მუშაობას ძეგლთა დაცვის ეროვნული სააგენტოს კონსტრუქტორი.

"რაც შეეხება სამუზეუმო საქმეს, ამ პროცესში ჩართულია დირექტორის მოადგილე გია მარსაგიშვილი, რომელსაც დანანებით უნდა ვთქვა, რომ აზრს არც კი ეკითხებოდნენ, ისე მართავდნენ ფონდის უფროსები ამ მუზეუმს. მინდა მათ მოვუწოდო, რომ ბატონი გიას კომპეტენტურობას ენდონ იმიტომ, რომ მისი კომპეტენტურობა არ დგება კითხვის ნიშნის ქვეშ არავის მიერ.

ასევე ჩვენ გვყავს მუზეუმის შესანიშნავი მენეჯერი. მუზეუმს აქამდე კომპეტენტური მენეჯერი არ ჰყოლია და ეს გახლავთ ბატონი ნიკა ახალბედაშვილი. ამასთან, ყველა თანამშრომელი, ვინც მანამდე მუშაობდა, რჩება ადგილზე. ვისაც უნდა შრომა, შრომობს. ვისაც ყვირილი უნდა, ყვირის, მაგრამ ვინც ყვირის, მასაც მოუწევს მუშაობა იმიტომ, რომ ფონდებში არის მძიმე მდგომარეობა და ინვენტარიზაციის შედეგები ამას აჩვენებს", — აცხადებს ის.

პუშკინის სკვერში ხელოვნების მუზეუმთან დაკავშირებით 5 აგვისტოს საპროტესტო აქციები გაიმართა. შეკრებილები ითხოვდნენ, რომ ხელოვნების მუზეუმის შენობის გამაგრებისა და რესტავრაციის პროექტის მაღალი პროფესიული კვალიფიკაციის მქონე პირებმა შეასრულონ.

ხელოვნების მუზეუმის ირგვლივ პროცესები რამდენიმე კვირაა, დაძაბულია. მას შემდეგ, რაც წულუკიანმა განაცხადა, რომ მუზეუმი "მართვის განსაკუთრებულ რეჟიმზე" გადადის, ხოლო შენობის აღდგენა "რენტაბელური" არ იქნება, საზოგადოებაში პროტესტის ტალღა წამოვიდა. მუზეუმში ახალი ადმინისტრაციის პირობებში, სამინისტროს ჯერ არ წარუდგენია რესტავრაციის ახალი გეგმა და არ უსაუბრია კონკრეტულ ნაბიჯებზე, რომლის განხორციელებასაც სამომავლოდ აპირებს.

გაიგეთ მეტი:

• რა საფრთხეებია ხელოვნების მუზეუმში და რას უპირებს მას სამინისტრო