ეროვნულმა ბანკმა რეფინანსირების განაკვეთი 0,5 პროცენტული პუნქტით, 10%-მდე გაზარდა, რაც ნიშნავს იმას, რომ 140,1 ათას მომხმარებელს, რომელთაც კრედიტი რეფინანსირების განაკვეთზე აქვთ მიბმული, სესხის საპროცენტო განაკვეთი 0,5%-ით გაეზრდება.

ამ საკითხთან დაკავშირებით, კვლევას "საზოგადოება და ბანკები" აქვეყნებს, სადაც ნათქვამია, რომ 2021 წლის პირველი ივლისის მდგომარეობით ცვლადი საპროცენტო განაკვეთით 140 100 სესხია გაცემული. მათი აბსოლუტური უმრავლესობა რეფინანსირების განაკვეთზეა მიბმული, მთლიანი პორტფელი კი 7,8 მილიარდი ლარის ოდენობისაა.

ორგანიზაციის კვლევის მიხედვით, რეფინანსირების განაკვეთზე მიბმული სესხები სხვადასხვა ტიპის მიხედვით ასე ნაწილდება:

  • რაოდენობრივად პირველ ადგილზეა უძრავი ქონებით უზრუნველყოფილი სესხები. რეფინანსირების განაკვეთზე პირველი ივლისის მონაცემებით 60 300 სესხია მიბმული, საშუალოდ 11,54%-ში. მთლიანი პორტფელი კი 2,9 მილიარდი ლარია;
  • 30 400 ხელშეკრულებაა გაფორმებული ბიზნეს სესხების გასაცემად, რაც პირველი ივნისთან შედარებით 900-ით მეტია. მთლიანი პორტფელი 3,78 მილიარდი ლარია. აქედან მცირე და საშუალო ბიზნესის დასაფინანსებლად ბანკებმა 1,15 მილიარდი ლარი გასცეს, საშუალოდ 14,36%-ში. ხოლო მსხვილი ბიზნესი კი პირველი ივლისის მონაცემებით 2,62 მილიარდი ლარით დააკრედიტეს, საშუალო შეწონილ 13,32%-ში;
  • ყველაზე მცირე რაოდენობით გაცემულია რეფინანსირების განაკვეთზე მიბმული ავტოსესხი. სულ პირველი ივლისის მონაცემებით 700 ხელშეკრულებაა გაფორმებული. 19,2 მილიონი ლარი ბანკებმა საშუალოდ 21,13%-ში გაასესხეს.

აღსანიშნავია, რომ 3 300 ცვლად საპროცენტო განაკვეთზე მიბმული სესხის კონკრეტული მიზნობრიობა უცნობია. ამ სესხების მთლიანი მოცულობა 101,2 მილიონი ლარია.

შეგახსენებთ, რომ ეროვნული ბანკის მხრიდან რეფინანსირების განაკვეთის გაზრდა ქვეყანაში არსებულ მაღალ ინფლაციას უკავშირდება. 2021 წლის ივლისში წლიურმა ინფლაციამ 11,9% შეადგინა — ფასების ზრდის ამაზე მაღალი მაჩვენებელი ბოლოს 2011 წლის მაისში დაფიქსირდა, როდესაც წლიური ინფლაცია 14,3% იყო.

ეროვნული ბანკის პროგნოზით, 2022 წელს ინფლაცია შემცირებას დაიწყებს და მის საშუალოვადიან მიზნობრივ მაჩვენებელს, ანუ 3%-ს ეტაპობრივად დაუახლოვდება.