კულტურის, სპორტისა და ახალგაზრდობის მინისტრმა, თეა წულუკიანმა საპატრიარქოს სიწმინდეთა მოძიებისა და დაცვის განყოფილების ხელმძღვანელთან, მეუფე ვახტანგთან (ლიპარტელიანი) ერთად იმსჯელა, სად გადაიტანენ ხელოვნების მუზეუმის ოქროს ფონდს.

სამინისტროს მიერ გავრცელებული განცხადებიდან ვიგებთ, რომ ოქროს ფონდში შემავალი 1 000-ზე მეტი ექსპონატის დროებითი განთავსების ადგილად ორი სივრცე განიხილება:

  1. შალვა ამირანაშვილის სახელობის ხელოვნების სახელმწიფო მუზეუმის უკანა კორპუსი. სამინისტროს ინფორმაციით, იგი ე.წ. სემინარიის შენობისგან დამოუკიდებელია, უფრო გვიანაა აშენებული და შედარებით მყარია;
  2. სიმონ ჯანაშიას სახელობის საქართველოს ისტორიის მუზეუმი.

სამინისტროს ინფორმაციით, ხელოვნების მუზეუმის უკანა კორპუსში შესაძლებელია განთავსდეს არა მხოლოდ ოქროს, არამედ ყველა სხვა ფონდიც, თუმცა ის გარკვეული სამუშაოების ჩატარებას საჭიროებს. რაც შეეხება ისტორიის მუზეუმს, მისი როგორც საგამოფენო, ისე ფონდსაცავი სივრცეები მზადაა, თუმცა ფართიდან გამომდინარე მასში მხოლოდ ოქროს ფონდის განთავსება მოხერხდება, ისიც არასრულად.

სამინისტროს განცხადებაში ვკითხულობთ, რომ ამ ორ სივრცეს შორის ერთ-ერთის ასარჩევად მუშაობას გააგრძელებს როგორც თავად უწყება, ისე საპატრიარქო.

აღსანიშნავია, რომ ოქროს ფონდის რომელიმე სივრცეში გადატანამდე მისი აღწერა უნდა დასრულდეს და ზოგიერთი ექსპონატი პროფესიონალებმა გაამაგრონ.

შალვა ამირანაშვილის სახელობის ხელოვნების სახელმწიფო მუზეუმში დაცული ფონდების სხვაგან გადატანის საკითხი დღის წესრიგში მას შემდეგ დადგა, რაც გადაწყდა, რომ მუზეუმის ძირითადი, ე.წ. სემინარიის შენობა აღდგენას საჭიროებს. სამინისტროში აცხადებენ, რომ შენობის აღდგენისა და განახლების შემდეგ, ექსპონატები კვლავ დაუბრუნდება მუზეუმს.

მუზეუმის ყოფილი მმართველი, ეკა კიკნაძე ევაკუაციის დაწყებას ამ ეტაპზე დაუშვებლად მიიჩნევს. მისივე თქმით, ევაკუაციის საავტორო პროექტზე ეროვნული მუზეუმის სხვადასხვა პროფილის სპეციალისტების დიდი გუნდი მუშაობდა, ხოლო მის უშუალო განხორციელებაზე პასუხისმგებლები თავად ის, მისი მოადგილე და მუზეუმის კოლექციების მართვის დეპარტამენტის ხელმძღვანელი იყო. კიკნაძე ამბობს, რომ წულუკიანის მიერ ახალი დირექციის დანიშვნის შემდეგ მათ მიერ შემუშავებული პროექტი დღის წესრიგიდან მოხსნა, ევაკუაციის ახალი გეგმის მოთხოვნის შემდეგ კი მმართველის თანამდებობიდან ლაბორანტის პოზიციაზე გადაიყვანეს.

გაიგე მეტი: