დღეს საქართველოს პრეზიდენტის ადმინისტრაციაში საქართველოს კონსტიტუციის "სახალხო განხილვა" იწყება. შეხვედრა 15 საათზე იწყება. შეხვედრას არ დაესწრებიან საქართველოს საპარლამენტო უმრავლესობის, ქართული ოცნების დეპუტატები.

საქართველოს პარლამენტის თავმჯდომარე ირაკლი კობახიძე მიიჩნევს, რომ ამ ინიციატივით, პრეზიდენტი უპირისპირდება საქართველოს პარლამენტს და სახელმწიფო საკონსტიტუციო კომისიას და უპატივცემულობას გამოხატავს ქვეყნის მთავარი დემოკრატიული კონსტიტუციური ინსტიტუტის მიმართ.

ირაკლი კობახიძის მიერ გავრცელებული განცხადების მიხედვით, პრეზიდენტის უპასუხისმგებლობა გამოიხატება შემდეგი გარემოებებით:

  • პრეზიდენტმა სხდომა იმ დროს დანიშნა, როცა საკონსტიტუციო კომისიის 34 დეპუტატი და პარლამენტის თავმჯდომარე თავიანთი უშუალო უფლებამოსილება უნდა შეასრულონ;
  • საქართველოს კონსტიტუციის გადასინჯვის კანონპროექტის საყოველთაო-სახალხო განხილვის ორგანიზება არის საქართველოს პარლამენტის ექსკლუზიური უფლებამოსილება, პრეზიდენტს კი, უფლება აქვს მხოლოდ მხარი დაუჭიროს საქართველოს პარლამენტს აღნიშნული განხილვის ორგანიზებაში;
  • კონსტიტუციის გადასინჯვის კანონპროექტის საყოველთაო-სახალხო განხილვა შეიძლება გაიმართოს მხოლოდ მას შემდეგ, რაც მომზადდება და საქართველოს პარლამენტს ინიციატივის წესით წარედგინება კონსტიტუციის გადასინჯვის კანონპროექტი.

საქართველოს პრეზიდენტის ადმინისტრაციის ხელმძღვანელი, გიორგი აბაშიშვილი ამბობს, რომ ამით პარლამენტის თავმჯდომარე საქართველოს პრეზიდენტს "უწესებს აკრძალვას საკონსტიტუციო საკითხებზე ესაუბროს საკუთარ ხალხს".

საპარლამენტო უმცირესობის - მოძრაობა თავისუფლებისთვის - ევროპული საქართველოს წარმომდგენელი, ირაკლი აბესაძე მიიჩნევს, რომ საპარლამენტო უმრავლესობა საზოგადოებისა და სახელმწიფო ინტერესებიდან გამომდინარე არ მოქმედებენ.

"მათ ამოძრავებთ ის პოლიტიკური დავალება და ნება, რაც მომდინარეობს ბიძინა ივანიშვილისგან - ყველა თანამდებობის პირი ემორჩილებოდეს მათ," - აღნიშნავს აბესაძე.

73-წევრიან საკონსტიტუციო კომისიაში, რომელიც რამდენიმე თვის წინ შეიქმნა არ მონაწილეობს პრეზიდენტი და პრეზიდენტის ადმინისტრაციის რომელიმე წარმომდგენელი. გადაწყვეტილების საჯაროდ გავრცელების შემდეგ, პრეზიდენტის ადმინისტრაციაში განმარტეს, რომ კომისიის შექმნის წესი ბევრ კითხვის ნიშანს აჩენს და მასში მეტი აქცენტია ერთპიროვნულ და ერთპარტიული გადაწყვეტილებები მიღებაზე.