"გულწრფელად გეტყვით, რომ დღემდე ვერ მოვძებნე ფორმულა, როგორ უნდა შევაფასო წულუკიანის ქცევა", — ასე ეხმაურება ნაციონალური მოძრაობის დეპუტატი, ხატია დეკანოიძე კულტურის მინისტრის ქმედებას. დეკანოიძე ამბობს, რომ ჟურნალისტისთვის მიკროფონის გამოგლეჯა და საქმიანობაში ხელშეშლა სისხლის სამართლის დანაშაულია.

"მიტაცებაა, წარმოუდგენელია. საშიშია და ახალისებს იმ ძალადობას, რომ მინისტრი, კულტურის მინისტრი, რომელსაც საერთოდ სხვა პრიორიტეტები უნდა ჰქონდეს და იქცევა ისე, როგორც იქცევა ეს არის გზავნილი დანარჩენი საზოდგადოების მიმართ და მე შემიძლია ყველაფერი ჩავიდინო და დავუძახო პოლიციას ვიღაცეები, ასეთი სიტყვა და შეფასება მივცე და შემდეგ მე არავინ არ დამსაჯოს და მეც არანაირი პასუხისმგებლობა არ ვიგრძნო. რა თქმა უნდა, ეს არის ძალადობა, რომელსაც ახალისებს პრემიერმინისტრი და მინისტრები და ქართული ოცნების უმრავლესობა", — განაცხადა დეკანოიძემ.

დეკანოიძის განცხადებით, არსებობს მედიები, რომელთა სარედაქციო პოლიტიკას არ ეთანხმება, მაგრამ მათ მიკროფონს არ წაგლეჯს. მისი თქმით, ასე რომ მოიქცეს მწვავე შეფასებები მოყვება, რაც ორმაგ სტანდარტზე მიუთითებს.


ვიცე-პრემიერი და კულტურის მინისტრი, თეა წულუკიანი მთავარი არხის ჟურნალისტს მიკროფონს არ უბრუნებს. მან ემა გოგოხიას მიკროფონი სენაკის თეატრში წაართვა და შეუარცხყოფა მიაყენა.

უხეშად წართმევის შემდეგ, მინისტრმა მთავარი არხის მიკროფონით დაიწყო საუბარი და ბიძინა ივანიშვილს მადლობა გადაუხადა. წულუკიანი ჟურნალისტს უთხრა: "ემა, მოდი, აბა თქვი, ბიძინას გაუმარ...". მანვე Facebook-ზე გამოაქვეყნა ფოტო და დაწერა, რომ ამიერიდან გაკეთებული საქმეების შესახებ ამ მიკროფონით უნდა "გვაუწყოს". მინისტრის აზრით, ამ საქციელით ჟურნალისტი განაიარაღა.

აღსანიშნავია, რომ მთავარი არხის ჟურნალისტმა პოლიცია იქვე გამოიძახა. როგორც გოგოხიამ თქვა, საპატრულო პოლიციის თანამშრომლებმა უთხრეს, რომ საქმე არა მათი, არამედ კრიმინალური პოლიციის კომპეტენცია იყო, დაემშვიდობნენ და წავიდნენ. ამ ფაქტს სცენიდან გამოეხმაურა წულუკიანი, რომელსაც ხელში ისევ მთავარი არხის მიკროოფნი ეჭირა და განაცხადა, რომ "ვიღაცები" ტყუილად გამოიძახეს.

საქართველოს შინაგან საქმეთა სამინისტროში ისევ არ იციან, დაიწყო თუ არა გამოძიება თეა წულუკიანის მიერ ჟურნალისტისთვის მიკროფონის წართევაზე. On.ge უკვე რამდენიმე დღეა ცდილობს, უწყებიდან ამის შესახებ ინფორმაცია მიიღოს. ამ ქმედებაზე კითხვა დაუსვეს შინაგან საქმეთა მინისტრსაც. ვახტანგ გომელაურმა თქვა, რომ ინფორმაცია ახლა მიიღო და აუცილებლად გაერკვევა, რის შემდეგაც რამდენიმე დღე გავიდა.

მთავარმა არხმა პროკურატურასაც მიმართა. ნიკა გვარამიას თქმით, ეს არის ძალიან სახიფათო და პირდაპირი სიგნალი, რომ მედიაზე ძალადობრივი ზემოქმედების ახალი ტალღა იწყება.

წულუკიანი, რომელიც ამტკიცებდა, რომ მიკროფონს არ დააბუნებს ჟურნალისტს სვანეთში ეპატიჟება და ამბობს, რომ არხის კუთვნილ მიკროფონს სწორედ იქ დაუბრუნებს.

საქართველოს ახალგაზრდა იურისტთა ასოციაციის თავმჯდომარე On.ge-სთან განმარტავს, რომ კულტურის მინისტრის ქმედება სისხლის სამართლის კოდექსის 154-ე მუხლით გათვალისწინებულ დანაშაულის ნიშნებს შესაძლოა შეიცავდეს. ეს მუხლი ჟურნალისტურ საქმიანობაში უკანონო ხელის შეშლას გულისხმობს. ამასთან, ნიკა სიმონიშვილის განცხადებით, თუ წულუკიანი მიკროფონის დაბრუნებას არ აპირებს, გამოძიების დაწყება საკუთრების წინააღმდეგ მიმართული დანაშულისთვისაც შესაძლებელია.

გაიგე მეტი: