კოალიცია მედიის ადვოკატირებისთვის ყველა საჯარო პირს მოუწოდებს, რომ საზოგადოებაში მტრული განწყობების გაღვივება და მედიის დისკრედიტაცია შეწყვიტონ. ასე ეხმაურებიან ისინი ბოლო დღეებში სხვადასხვა პირის, მათ შორის, მთავრობის წარმომადგენლების მიერ გაკეთებულ განცხადებებს მედიებთან დაკავშირებით.

კერძოდ, კოალიციის თქმით, პრემიერმინისტრმა, ირაკლი ღარიბაშვილმა ჟურნალისტებისთვის "მოძალადეებისა" და "პარტიულ აქტივისტების" წოდებით კიდევ ერთხელ შეუწყო ხელი მედიის წარმომადგენლების მიმართ აგრესიის გაღვივებას.

გარდა ამისა, ისინი მიუთითებენ, რომ კულტურის მინისტრის, თეა წულუკიანის მიერ ჟურნალისტისთვის მიკროფონის წართმევა შეიცავს სისხლის სამართლის დანაშაულის ნიშნებს. მათი თქმით, გამოძიება უნდა დაიწყოს, როგორც ჟურნალისტურ საქმიანობაში უკანონოდ ხელის შეშლის, ისე სხვისი ქონების მართლსაწინააღმდეგოდ მითვისების ფაქტთან დაკავშირებით.

ამასთან, ერთობლივ განცხადებაში ხელმომწერი ორგანიზაციები აფასებენ საპატრიარქოს განცხადებასაც და აღნიშნავენ, რომ მისი პათოსი მმართველი გუნდის საჯარო განცხადებებთანაა თანხვედრაში.

"გუშინვე, საქართველოს საპატრიარქოს საზოგადოებასთან ურთიერთობის სამსახურმა გაავრცელა განცხადება, სადაც მწვავედ გააკრიტიკა მედიის წარმომადგენლები და პრაქტიკულად მოუწოდა სასულიერო პირებს კომუნიკაცია შეწყვიტონ კრიტიკული სარედაქციო პოლიტიკის მქონე მედიებთან. საპატრიარქოს განცხადების პათოსი თანხმობაშია მმართველი გუნდის საჯარო განცხადებებთან, რაც კიდევ უფრო აძლიერებს მედიის მიმართ ძალადობის ესკალაციის რისკებს", — ნათქვამია განცხადებაში.

კოალიცია მედიის ადვოკატირებისათვის პარტნიორი ორგანიზაციები მიიჩნევენ, რომ ეს არის კოორდინირებული შეტევა მედიაზე, რაც საგანგაშოა იმის ფონზე, რომ ხელისუფლება არ ცდილობს მიიღოს პრევენციული ზომები ჟურნალისტებისა და ოპერატორების უსაფრთხოების დაცვის მიზნით. ისინი აღნიშნავენ, რომ უფრო მეტიც, ხელისუფლება ჟურნალისტების უფლებების პატივისცემისკენ მოწოდებებს "დეზინფორმაციას" და "ცილისწამებას" უწოდებს, ხოლო 5-6 ივლისს მედიის მიმართ უპრეცედენტო მასშტაბის ძალადობის ორგანიზატორებს არ აკავებს.

"გვაქვს მოლოდინი, რომ ხელისუფლებისა და მასთან დაკავშირებული ძალების მხრიდან მედიის მიმართ აგრესიის გაძლიერება კიდევ უფრო გაზრდის ჟურნალისტებზე და ოპერატორებზე თავდასხმების რაოდენობას", — აცხადებენ ხელმომწერი ორგანიზაციები.

ისინი მოუწოდებენ ხელისუფლებას, შეწყვიტონ ჟურნალისტებზე ძალადობის წახალისება, საჯაროდ გაემიჯნონ ჟურნალისტების მიმართ გამოვლენილი ძალადობის პრაქტიკასა და მიიღონ ზომები უსაფრთხო გარემოს შექმნისათვის.

ამასთან, ისინი მიმართავენ სამართალდამცავ ორგანოებს, რომ დაუყოვნებლივ დაიწყონ გამოძიება თეა წულუკიანის მიერ მთავარი არხის ქონების მიტაცებისა და ჟურნალისტურ საქმიანობაში უკანონოდ ხელისშეშლის ფაქტებთან მიმართებით.

"მოვუწოდებთ ყველა საჯარო პირს, მათ შორის, საქართველოს საპატრიარქოს, შეწყვიტონ საზოგადოებაში მტრული განწყობების გაღვივება და მედიის დისკრედიტაცია", — წერია განცხადებაში.

ხელმომწერი ორგანიზაციებია:

  • ინფორმაციის თავისუფლების განვითარების ინსტიტუტი — IDFI;
  • ლიბერალური აკადემია თბილისი;
  • მედიაკლუბი;
  • მედიის განვითარების ფონდი;
  • მედიის უფლებები;
  • სატელევიზიო ქსელი;
  • საერთაშორისო გამჭვირვალობა — საქართველო;
  • სამართლიანი არჩევნების და დემოკრატიის საერთაშორისო საზოგადოება — ISFED;
  • საქართველოს ახალგაზრდა იურისტთა ასოციაცია — GYLA;
  • საქართველოს დემოკრატიული ინიციატივა — GDI;
  • საქართველოს რეგიონული მედიის ასოციაცია — GRMA;
  • საქართველოს მცირე და საშუალო სატელეკომუნიკაციო ოპერატორთა ასოციაცია;
  • საქართველოს ჟურნალისტური ეთიკის ქარტია;
  • უფლებები საქართველო;
  • ღია საზოგადოების ფონდი — OSGF.