საქართველოს პრემიერმინისტრი, ირაკლი ღარიბაშვილი ჟურნალისტს მიმართავს და ეუბნება, რომ ის "ადგილს აფუჭებს" და სურს, რომ პარლამენტში იხილოს.

"თქვენ ხართ პირდაპირ პარტიული აქტივისტი, ნაცმოძრაობის წევრი ხართ თქვენ, რომელიც ფინანსდება ყველაზე დიდი მძარცველი კეზერაშვილის მიერ [...] თქვენ ახლა ადგილს აფუჭებთ, თქვენ უნდა იყოთ პარტიაში, თქვენ უნდა იყოთ წინა ხაზზე, პარლამენტში მინდა, რომ გიხილოთ თქვენ იმიტომ, რომ თქვენ ხართ ჩვეულებრივი პარტიული აქტივისტი", — აცხადებს პრემიერმინისტრი.

მისივე თქმით, სამწუხაროა, რომ ტელევიზიები პარტიული ორგანიზაციების დანაყოფებად გარდაიქმნა.

"მე მინდა ერთი გითხრათ, რომ ეს სიყალბე და ეს ძალადობა უნდა დაასრულოთ თქვენ. მე ამ შემთხვევაში თქვენ არ გელაპარაკებით, მაგრამ ველაპარაკები ამ შემთხვევაში იმ ადამიანებს, ვინც არიან თქვენი მმართველები. სამწუხაროა, რომ ტელევიზიები გარდაიქმნა უკვე პარტიული ორგანიზაციების დანაყოფებად", — თქვა პრემიერმინისტრმა.

ქართული ოცნების წარმომადგენლებმა კრიტიკულ მედიასთან კომუნიკაცია მას შემდეგ გაწყვიტეს, რაც ჟურნალისტებმა კოლეგის, ლექსო ლაშქარავას გარდაცვალებაზე პასუხისმგებლობა მთავრობას დააკისრეს და პრემიერმინისტრის, ირაკლი ღარიბაშილის გადადგომა მოითხოვეს.

17 ივლისს, პრემიერმინისტრის, ირაკლი ღარიბაშილის ღონისძიებაზე არ მიიწვიეს სამი ტელეკომპანია — მთავარი არხი, TV პირველი და ფორმულა. ღონისძიებაზე მიწვეული არ იყო არც ონლაინმედია. On.ge-მ მიზეზი მთავრობის ადმინისტრაციის პრესსამსახურს ჰკითხა, რომელმაც ეს ინფორმაცია დაადასტურა და მიზეზად დაასახელა ის, რომ ამ სამ არხს "კითხვებზე პასუხები არ აინტერესებს" და ისინი მუდმივად "დესტრუქციულად" იქცევიან.