იურიდიულ საკითხთა კომიტეტის თავმჯდომარის პირველი მოადგილე, დავით მათიკაშვილი კრიტიკული მედიის კითხვებს არ პასუხობს. ჟურნალისტების კითხვებს დღეს პასუხს არ სცემდენენ ქართული ოცნების სხვა დეპუტატებიც.

"ჟურნალისტებად ჩამოყალიბდით და მერე გაგცემთ პასუხის. პოლიტიკურ პარტიებს არ ვაძლევ ინტერვიუს" — განუცხადა მათიკაშვილმა ჟურნალისტებს.

დღეს მმართველი პარტია თბილისის მერობის კანდიდატად მოქმედ მერს, კახა კალაძეს წარადგენს. ჟურნალისტები ქართული ოცნების დეპუტატების ეკითხებოდნენ, რატომ გადაწყვიტა პარტიამ მერობის კანდიდატად ისევ კალაძის წარდგენა, თუმცა, როგორც უკვე აღვნიშნეთ, დეპუტატებმა მათ პასუხი არ გასცეს.

ქართული ოცნების წარმომადგენლებმა კრიტიკულ მედიასთან კომუნიკაცია მას შემდეგ გაწყვიტეს, რაც ჟურნალისტებმა კოლეგის, ლექსო ლაშქარავას გარდაცვალებაზე პასუხისმგებლობა მთავრობას დააკისრეს და პრემიერმინისტრის, ირაკლი ღარიბაშილის გადადგომა მოითხოვეს.

17 ივლისს, პრემიერმინისტრის, ირაკლი ღარიბაშილის ღონისძიებაზე არ მიიწვიეს სამი ტელეკომპანია — მთავარი არხი, TV პირველი და ფორმულა. ღონისძიებაზე მიწვეული არ იყო არც ონლაინმედია. On.ge-მ მიზეზი მთავრობის ადმინისტრაციის პრესსამსახურს ჰკითხა, რომელმაც ეს ინფორმაცია დაადასტურა და მიზეზად დაასახელა ის, რომ ამ სამ არხს "კითხვებზე პასუხები არ აინტერესებს" და ისინი მუდმივად "დესტრუქციულად" იქცევიან.