"იცით სიტყვა ნახვამდის მნიშვნელობა?", — ასე პასუხობს ქართული ოცნების დეპუტატი, მიხეილ სარჯველაძე ფორმულას ჟურნალისტს, ვახო სანაიას, რომელიც პარლამენტში მას 5 ივლისს განვითარებულ მოვლენებთან დაკავშირებით კითხვებს უსვამდა.

"კადრებში ჩანან დამნაშავეები, რატომ არ სჯით, შეგიძლიათ, მითხრათ?", — ჰკითხა სანაიამ სარჯველაძეს, თუმცა დეპუტატმა განუცხადა, რომ კითხვები ჟურნალისტს საკუთარი თავისთვის დაესვა.

"წესიერად მოიქეცით, საკუთარ თავთან გაქვთ კითხვები დასასმელი და მე გირჩევთ, რომ პირველ რიგში თქვენ დაუსვათ საკუთარ თავს", — აცხადებს სარჯველაძე

მედიის წარმომადგენლები 5-6 ივლისის ძალადობრივი მოვლენების გასაპროტესტებლად პარლამენტთან დღესაც შეიკრიბნენ. მათ შენობაზე პლაკატები გააკრეს და დამნაშაავების დასჯა კიდევ ერთხელ მოითხოვეს.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.