ძალადობრივი და პრორუსული არხის, Alt-Info-ს ფეისბუქგვერდი, რომელიც სამი დღის წინ შეიქმნა, აღარ იძებნება. ინფორმაციას პლატფორმის წარმომადგენლებიც ადასტურებენ და აცხადებენ, რომ გვერდი წაუშალეს.

ეს არ არის პირველი შემთხვევა, როცა სოციალური ქსელიდან იშლება Alt-Info და მასთან დაკავშირებული ქსელები. მიზეზი, ჩვეულებრივ, ძალადობრივი შინაარსის მასალების განთავსება, ცრუ ინფორმაციის გავრცელება და დისკრიმინაციული განცხადებებია.

ბოლოს Alt-Info-ს გვერდი 16 ივლისს წაიშალა, სწორედ იმ დღეს, როცა პლატფორმის ყველა წევრი შინაგან საქმეთა სამინისტრომ გამოკითხვაზე დაიბარა, დამფუძნებლების, ზურაბ მახარაძისა და კონსტანტინე მორგოშიას საცხოვრებელი სახლები კი გაჩხრიკეს. გამოკითხვიდან გამოსვლის შემდეგ მათ დაადასტურეს, რომ პოლიციას კითხვები 5-6 ივლისის ძალადობრივი კონტრაქციის ორგანიზებასთან დაკავშირებით ჰქონდა.

დღეს, 19 ივლისს, ორგანიზაცია სამართლიანმა არჩევნებმა განაცხადა, რომ Alt-Info-ს ვებგვერდი Facebook-მა მათი შეტყობინების საფუძველზე წაშალა.

Alt-Info-ს ვებგვერდი გაითიშა 11 ივლისსაც. ამის მიზეზი ფეისბუქმომხმარებელ როი შენგელია მიმართვა იყო, რომელმაც ჰოსტინგ კომპანია iPage.Com-ს აცნობა, რომ აღნიშნული ვებგვერდი ავრცელებს სიძულვილის ენას, მოუწოდებს ხალხს აგრესიისკენ და არღვევს ანტი დისკრიმინაციულ კანონს, რის შემდეგაც გვერდი გაითიშა.

გაიგე მეტი: