ქართული ოცნების დეპუტატის, ნინო წილოსანის განცხადებით, პარლამენტის თავმჯდომარის ადგილის, გუშინ კი ტრიბუნის ბლოკირება, "ბუნებრივად აღიქმება ძალადობრივ აქტად, რომელიც თავის თავში გულისხმობს ნაციონალური მოძრაობის რევოლუციური მიზნის ასრულების მცდელობას". ასე გამოეხმაურა ის 18 ივლისს პარლამენტში მიმდინარე მოვლენებს, მათ შორის, დეპუტატი, შალვა პაპუაშვილის მიერ ნაციონალური მოძრაობის წევრის, თინა ბოკუჩავას ტრიბუნიდან ძალის გამოყენებით გაყვანას.

"პარლამენტის წევრებს შორის ფიზიკური დაპირისპირება, მათ შორის ქალების მონაწილეობით, ძალიან მძიმე საყურებელია. თუმცა, სწორედ ეს არის პროვოკატორთა ამოცანა", — წერს ის საკუთარ ფეისბუქგვერდზე.

წილოსანის განცხადებით, ისურვებდა, რომ მისი ქალი კოლეგები "არ ერთვებოდნენ ამ დესტრუქციულ პროცესში".

"ასევე, ვისურვებდი, რომ დეპუტატების ფიზიკური ხელშეუხებლობა, განსაკუთრებთ კი ქალების, იყოს უზრუნველყოფილი. რადგან ქალები ისედაც დიდი ბარიერების წინაშე დგანან პოლიტიკაში თავის დასამკვიდრებლად. იმედი მაქვს, რომ ცივილურობის იმ დონემდეც მივა პოლიტიკური გარემო საქართველოში და ჩვენს საზოგადოებას არ მოუწევს ამ უმსგავსობების ყურება", — განაცხადა მან.

მისი თქმით, პარლამენტის წევრის ქცევის კოდექსი ქართული ოცნების მიერ დანერგილი ინსტრუმენტია, თუმცა მას ოპოზიცია არ იცავს და "განუწყვეტლივ უქმნის საფრთხეს" ქვეყნის ინსტიტუციების რეპუტაციას და სტაბილურობას.

გუშინ, 18 ივლისს ქართული ოცნების დეპუტატმა, შალვა პაპუაშვილმა ნაციონალური მოძრაობის წევრი, თინა ბოკუჩავა პარლამენტის ტრიბუნიდან ძალის გამოყენებით გაიყვანა.

18 ივლისს პარლამენტში შინაგან საქმეთა მინისტრი, ვახტანგ გომელაური მივიდა. მას მედიისა და ოპოზიციის წარმომადგენლები პროტესტით დახვდნენ. მინისტრის სიტყვით გამოსვლის დაწყებისთანავე ჟურნალისტებმა პლენარული სხდომის დარბაზში გადმოფინეს ბანერი წარწერით — "დასაჯეთ მოძალადეები".

პარალელურად, ოპოზიციონერმა დეპუტატებმა გომელაურს სიტყვა შეაწყვეტინეს და ტრიბუნასთან გარდაცვლილი ოპერატორის, ლექსო ლაშქარავას ფოტოები გაშალეს.

თუმცა მმართველმა პარტიამ გომელაურის საპარლამენტო მოსმენა გადადო, მიზეზად კი მედიის წარმომადგენლების და ოპოზიციის პროტესტი დაასახელა.