ქართული ოცნების თავმჯდომარემ, ირაკლი კობახიძემ 5 ივლისს, ძალადობრივ კონტრაქციაზე დაზარალებული ჟურნალისტები სამ ჯგუფად დაჰყო: მძიმედ დაშავებულები, ზედაპირული დაზიანებების მქონე და სხვები, რომლებსაც, ასევე, მიაყენეს ფიზიკური შეურაცხყოფა.

"ძალადობის ფაქტები იყო — 6 ჟურნალისტი იყო მძიმედ დაშავებული, 2 პოლიციელი იყო მძიმედ დაშავებული, 15 ჟურნალისტს დამატებით ჰქონდა ზედაპირული დაზიანებები და ა.შ. და სხვებსაც მიაყენეს ფიზიკური შეურაცხყოფა", — განაცხადა კობახიძემ რუსთავი 2-ის ეთერში.

ჟურნალისტის კითხვას, ამგვარი კლასიფიკაციით იმის თქმა ხომ არ სურს, რომ ძალადობრივ კონტრაქციაზე 53 ჟურნალისტი არ დაზარალებულა, კობახიძემ ასე უპასუხა:

"ეს ყველაფერი ხომ მეორეხარისხოვანია. მთავარი არის, რომ ძალადობა ატარებდა მასობრივ ხასიათს და ეს არის ძალიან მძიმე. ასეთი რამ საქართველოში არასდროს მომხდარა. ამას სჭირდება, ბუნებრივია, ჩაღრმავება და სათანადო ყურადღება, მაგრამ, ერთ რამეშია აქ საქმე — როდესაც ამბობენ 53 შემთხვევას, საზოგადოებას ექმნება ისეთი წარმოდგენა, თითქოს 53 ჟურნალსიტი არის მძიმედ დაშავებული. მძიმედ დაშავებულია 6 ჟურნალისტი".

5 ივლისს, თბილისის პრაიდის საწინააღმდეგო ძალადობრივ კონტრაქციაზე 53 ჟურნალსიტი ჰომოფობიური და ძალადობრივი ჯგუფების თავდასხმების მსხვერპლი გახდა. ჟურნალისტებს აქციის მონაწილეები ფიზიკურად გაუსწორდნენ, დაუზიანეს ტექნიკა, აიძულებდნენ გადაღებული მასალების წაშლას და აყენებდნენ სიტყვიერ შეურაცხყოფას. მათი ნაწილი ფიზიკური დაზიანებების გამო ამ დრომდე ვერ ახერხებს პროფესიული მოვალეობის გაგრძელებას. მათ შორისაა პალიტრანიუსის ფოტოგრაფი, გიორგი ნიკოლიშვილი. მისი თქმით, ამ დღემდე აქვს ტკივილები თავს არეში და ჰემატომა ტვინში.

ძალადობრივ კონტრაქციაზე სასტიკად ნაცემი TV პირველის ოპერატორი, ლექსო ლაშქარავა 11 ივლისს გარდაიცვალა. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. შინაგან საქმეთა სამინისტომ 12 ივლისს განაცხადა, რომ შუალედური ექსპერტიზის მიხედვით, გარდაცვალების მიზეზი შესაძლოა ზედოზირება გამხდარიყო. მედიის წარმომადგენლებს დიდ ნაწილს ამ ვერსიის არ სჯერა და გამოძიების გამჭვირვალედ ჩატარებას ითხოვს. 11 და 12 ივლისს ჟურნალისტების მიერ ორგანიზებულ აქციებზე, სადაც პრემიერმინისტრის, ირაკლი ღარიბაშილის გადადგომას მოითხოვდნენ, ათასობით ადამიანი შეიკრიბა.

პროტესტის ნიშნად დღეს, 14 ივლისს, 4-მა ტელევიზიამ — TV პირველმა, მთავარმა არხმა, ფორმულამ და კავკასიამ პროტესტის ნიშნად მაუწყებლობა 24 საათით შეაჩერა. მთელი დღის განმავლობაში აღნიშნული ტელევიზიების ეთერში ჩანს წარწერა: "გადადგეს ირაკლი ღარიბაშვილი! დაისაჯოს ყველა მოძალადე!", ამის შემდეგ კი იმ ჟურნალისტების სია, რომლებიც 5 და 6 ივლისს დაშავდნენ. სიის დასრულების შემდეგ, წარწერები ხელახლა გამოდის.

გაიგე მეტი: