ევანგელურ-ბაპტისტური ეკლესიის ეპისკოპოსმა, რუსუდან გოცირიძემ რუსთაველზე სიტყვით გამოსვლისას განაცხადა, რომ ქრისტიანობა სილაღე და თავისუფლებაა და თუ ეს ქვეყანა ქრისტიანობაზე თავს დებს, ასე უნდა ცხოვრობდეს. მანვე აღნიშნა, რომ იბრძვის რადგან არ უნდა ისეთ ქვეყანაში გაღვიძება, სადაც ჩაცმულობის ან ვიზუალის გამო ადამიანებს თავს ესხმიან.

"მე არ მინდა ისეთი დილა კიდევ გათენდეს, როცა ვიფიქრებ ჩემი შვილი როგორი ჩაცმული არის დღეს გასული ქალაქში, ვინმეს თვალში მოხვდება და შეიძლება არ მოეწონოს და მუშტი მოხდეს. მე არ მინდა კიდევ ერთი დილა გაგვითენდეს ისეთი, როდესაც დავიწყებთ ჩვენი მეგობრებისთვის შენიშვნის მიცემას, იქნებ ეს საყურე მოიხსნა რომ მშვიდად გაიარო ის ქუჩა, სანამ სახლამდე მიხვალ.

არ მინდა რომ ჩემი შვილების, ამ ქვეყნის ახალგაზრდა თაობას სილაღე წაერთვას. ქრისტიანობა არის სილაღე, ქრისტიანობა არის თავისუფლება და ეს ქვეყანა თუ ქრისტიანობაზე ვდებთ თავს, სწორედ თავისუფლებისა და სილაღისაა", — განაცხადა გოცირიძემ.

გარდა ამისა, გოცირიძემ ხელისუფლების პასუხისმგებლობაზე ისაუბრა და განაცხადა, რომ მათ უმცირესობების და ჩაგრული ჯგუფების დაცვა ევალებათ.

"ვინ არის ჩემი მოყვასი? ის არის, ვისაც დღეს ჩემს გვერდით დგომა სჭირდება, ვისაც ხმა არ აქვს და მე უნდა ამოვიღო მის მაგივრად ხმა და თუ მე ჩამიწყდება ხმა, ჩემი მოყვასი იქნება, ვინც ჩემს მაგივრად ამოიღებს ხმა. დღეს დილას ჩვენმა ხელისუფლებამ გვითხრა, რომ დამთავრდა უმცირესობის ძალმომრეობრივი ბატონობა, 11 ივლისი რომ არ იყოს გათენებული ამ ქალაქში ვკითხავდი, რომ ნეტა როდის იყო რომ უმცირესობამ ძალმომრეობით რამე აჯობა უმრავლესობას ამ ქვეყანაში.

გუშინ 11 ივლისს მედიის წარმომადგენლებმა ერთობლივი აქცია გამართეს. მათ გააპროტესტეს ჟურნალისტებზე ძალადობა და 5 ივლისს ნაცემი TV პირველის ოპერატორის გარდაცვალების გამო მთავრობას პასუხისმგებლობის აღება მოსთხოვეს. აქციის მთავარი მოთხოვნები იყო პრემიერმინისტრისა და შინაგან საქმეთა მინისტრის გადადგომა და დამნაშავეების დასჯა.

აქციის მონაწილეებმა ულტიმატუმი წამოუყენეს ხელისუფლებას და მოთხოვნების შესასრულებლად ვადა12 ივლისამდე მისცეს. იმავე დღეს ქართული ოცნების წარმომადგენლებმა განაცხადეს, რომ ღარიბაშვილი გადადგომას არ აპირებდა, რაც პრემიერის რიტორიკითაც დადასტურდა.

რაც შეეხება ოპერატორის გარდაცვალების საქმეს, დაწყებულია გამოძიება. 11 ივლისს შსს-მ ორი საგანგებო ბრიფინგი ჩანიშნა და ორივეთი მიანიშნა, რომ გარდაცვლილი შესაძლოა არაფხიზელ მდგომარეობაში ან ნარკოტიკული თრობის ქვეშ იყო. ეს ვერსია აქტიურად ვითარდებოდა სოციალურ ქსელში პროსახელისუფლებო ტროლგვერდებზეც, რომლებიც მედიისა და გარდაცვლილის დისკრედიტაციას ეწეოდნენ.

13 ივლისს მესამე ბრიფინგზე შინაგან საქმეთა სამინისტრომ განაცხადა, რომ შუალედური ექსპერტიზის მიხედვით, ლექსო ლაშქარავა შესაძლოა ზედოზირებით გარდაიცვალა.