დეკანოზმა ზაზა თევზაძემ მედიას მხარდაჭერა გამოუცხადა და აქციაზე სიტყვით გამოსვლისას განაცხადა, რომ ჟურნალისტებზე აღმართული ხელი, არის ხალხზე აღმართული ხელი, რადგან ისინი არიან საზოგადოების თვალი და ყური და ხედვის წერტილი. მანვე აღნიშნა, რომ ქრისტეს მოციქულები მისი ჟურნალისტები არიან.

"მე მინდა, როგორც მოძღვარმა ვთქვა მნიშვნელოვანი რამ, როგორც ეკლესიის მასწავლებელმა. დღეს არის ძალიან მნიშვნელოვანი საეკლესიო დღე. ეს დღე არის მოციქულების დღე და მოციქულები არიან ქრისტეს მედია, ქრისტეს ჟურნალისტები და ისინი ასწავლიან, იმათმა შეცვალეს სამყარო. ამ თვალსაზრისით მეც მედიას წარმოვადგენ ღმერთსა და ადამიანებს შორის. კარგად გავიგოთ, კარგად გავიაზროთ, კარგად შევიმეცნოთ", — განაცხადა მან.

დეკანოზმა აღნიშნა ისიც, რომ ბრძოლა უნდა გაგრძელდეს ბოლომდე და უკან არ უნდა დაიხიონ — "იმიტომ რომ უკან გზა არ არსებობს, მხოლოდ წინ, ჭეშმარიტებისა და თავისუფლებისაკენ"

"მთელი თქვენი მრავალფეროვნებით და განშტოებულებით თქვენ ხართ ის ადამიანები, რომლებიც მოვალე ხართ, რომ ეს რეალობა შეცვალოთ. ამას ჩვენს მაგივრად არავინ გააკეთებს, ეს არის ჩვენი გასაკეთებელი. ჩვენ არ გვაქვს უფლება უარი ვთქვათ ღირსებაზე, თავისუფლებაზე, ჭეშმარიტებაზე", — განაცხადა მან.

გუშინ 11 ივლისს მედიის წარმომადგენლებმა ერთობლივი აქცია გამართეს. მათ გააპროტესტეს ჟურნალისტებზე ძალადობა და 5 ივლისს ნაცემი TV პირველის ოპერატორის გარდაცვალების გამო მთავრობას პასუხისმგებლობის აღება მოსთხოვეს. აქციის მთავარი მოთხოვნები იყო პრემიერმინისტრისა და შინაგან საქმეთა მინისტრის გადადგომა და დამნაშავეების დასჯა.

აქციის მონაწილეებმა ულტიმატუმი წამოუყენეს ხელისუფლებას და მოთხოვნების შესასრულებლად ვადა12 ივლისამდე მისცეს. იმავე დღეს ქართული ოცნების წარმომადგენლებმა განაცხადეს, რომ ღარიბაშვილი გადადგომას არ აპირებდა, რაც პრემიერის რიტორიკითაც დადასტურდა.

რაც შეეხება ოპერატორის გარდაცვალების საქმეს, დაწყებულია გამოძიება. 11 ივლისს შსს-მ ორი საგანგებო ბრიფინგი ჩანიშნა და ორივეთი მიანიშნა, რომ გარდაცვლილი შესაძლოა არაფხიზელ მდგომარეობაში ან ნარკოტიკული თრობის ქვეშ იყო. ეს ვერსია აქტიურად ვითარდებოდა სოციალურ ქსელში პროსახელისუფლებო ტროლგვერდებზეც, რომლებიც მედიისა და გარდაცვლილის დისკრედიტაციას ეწეოდნენ.

13 ივლისს მესამე ბრიფინგზე შინაგან საქმეთა სამინისტრომ განაცხადა, რომ შუალედური ექსპერტიზის მიხედვით, ლექსო ლაშქარავა შესაძლოა ზედოზირებით გარდაიცვალა.