ეკონომიკისა და მდგრადი განვითარების მინისტრის, ნათია თურნავას განცხადებით, ახლადშეძენილ პირველ და მეორე შვილზე ოჯახი ისარგებლებს იპოთეკური სესხის 6%-ის თანადაფინანსებით, ხოლო მესამე და ყოველ მომდევნო შვილზე — 8%-იანი სუბსიდირებით.

ეს განცხადება მინისტრმა ეკონომიკის 10-წლიანი განვითარების გეგმის პრეზენტაციისას გააკეთა და დასძინა, რომ აღნიშნული პროგრამის ფარგლებში, მთავრობა განსაკუთრებულ აქცენტს მრავალშვილიან ოჯახებზე გააკეთებს.

"პროგრამა აწარმოე საქართველოში გასცემს საკმაოდ სოლიდური დოზით იპოთეკურის სესხის პროცენტის თანადაფინანსებას იმ ოჯახებისთვის, ვისაც ეყოლება ახალშეძენილი შვილი და მოინდომებენ თავისი საცხოვრებელი პირობების გაუმჯობესებას და ახალი ბინის შეძენას.

აქ ჩვენ განსაკუთრებულ აქცენტს ვაკეთებთ მრავალშვილიან ოჯახებზე, რაც ნიშნავს იმას, რომ პირველ, ან მეორე შვილის შეძენისას დღევანდელი მოცემულობით იპოთეკური სესხის, სულ მცირე, 6%-ის თანადაფინანსება მოხდება, ხოლო მესამე, ან ყოველ მომდევნო შვილზე 8%-იან თანადაფინანსებაზეა საუბარი, რაც ნიშნავს იმას, რომ პროცენტის უდიდესი ნაწილი იქნება სახელმწიფოს მიერ გაღებული. ეს პროგრამა უახლოეს პერიოდში დამტკიცდება და ამოქმედდება", — განაცხადა ნათია თურნავამ.

ოჯახებისთვის საცხოვრებელი ბინების შეძენის ხელშეწყობის პროგრამის შესახებ პრემიერმინისტრმა, ირაკლი ღარიბაშვილმა, რამდენიმე დღის წინ, პარლამენტში გამოსვლისას განაცხადა. მისი თქმით, აღნიშნული ინიციატივების უზრუნველსაყოფად მიმდინარე და 2022 წლების პერიოდში დამატებით 300 მილიონ ლარზე მეტი რესურსის მობილიზება მოხდება.