Sex Education ბრუნდება — ნახეთ ახალი ფოტოები მესამე სეზონიდან

Sex Education-ის გულშემატკივრებისთვის განსაკუთრებული სიახლე გვაქვს! როგორც იქნა, სერიალის მესამე სეზონის პრემიერის თარიღი ცნობილია! მეივი, ოტისი და ჩვენი საყვარელი გმირები ეკრანებზე 17 სექტემბერს ბრუნდებიან.

ნეტფლიქსმა მესამე სეზონი 2020 წლის თებერვალში დააანონსა და მას შემდეგ გულშემატკივრები სიახლეებს სულმოუთქმელად ელიან. თანაც თუ მეორე სეზონის დასასრულს გავიხსენებთ, ფანების მოუთმენლობა უცნაურად ნამდვილად აღარ მოგვეჩვენება.

ახალ ფოტოებში ჩვენს კარგად ნაცნობ პერსონაჟებს სკოლის ფორმები აცვიათ, შესაბამისად, შეგვიძლია ვივარაუდოთ, რომ სკოლაში საინტერესო ცვლილებები გველის. მესამე სეზონში ეიმი ფემინიზმს აღმოაჩენს, ჯექსონს ახალი "ქრაში" ეყოლება, ჩვენ კი ახალ დირექტორს გავიცნობთ. თუმცა, ალბათ, ყველაზე მეტად მაინც ის გვაინტერესებს, თუ როგორ გაარკვევენ მეივი და ოტისი წაშლილ ხმოვან შეტყობინებასთან დაკავშირებულ გაურკვევლობას.

Sex Education-ის პრემიერა ნეტფლიქსზე 2019 წელს შედგა და მაყურებელთა აღფრთოვანება და სიყვარული მალევე მოიპოვა. გარდა საინტერესო და დასამახსოვრებელი პერსონაჟების წარმოდგენისა, სერიალი მაყურებელს ისეთ მნიშვნელოვან თემებზე აწვდის ინფორმაციას, როგორიც სექსი, სექსუალობა, გენდერი და ა.შ.