თითქმის 8-თვიანი შეზღუდვის შემდეგ, კომენდანტის საათი იხსნება. ამის შესახებ დღევანდელი საკოორდინაციო საბჭოს შემდეგ გახდა ცნობილი. შემსუბუქდა სხვა შეზღუდვებიც, თუმცა სხვადასხვა პირობითა თუ რეკომენდაციით.

პირბადის რეგულაცია — მართალია, ღია სივრცეში პირბადის ტარების ვალდებულება აღარ გაქვთ, მაგრამ გამონაკლისია ავტობუსის გაჩერებები. ძალაში რჩება პირბადის ტარების ვალდებულება საზოგადოებრივ ტრანსპორტსა და დახურულ სივრცეებში.

"გასაგებია, რომ პირბადე აუცილებელი არ იქნება გარე სივრცეებში, მაგრამ ის რეკომენდებულია. ამიტომ, ვისაც უნდა და მიზანშეწონილად მიაჩნია, მან უნდა ატაროს და გეტყვით, რომ მიზანშეწონილია ჯერჯერობით პირბადე ვატაროთ", — თქვა ამირან გამყრელიძემ.

განახლება: მოგვიანებით ცნობილი გახდა, რომ პირბადე უნდა ვატაროთ ბაზრობებზეც. ამის შესახებ უწყებათაშორის საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძემ ისაუბრა.

კომენდანტის საათი — კომენდანტის საათის მოხსნა მხოლოდ იმიტომ თუ გინდოდათ, რომ მეგობრებთან ერთად გვიანობამდე გართობას აპირებდით, იმედები უნდა გაგიცრუოთ. როგორც აღმოჩნდა, გადაადგილების შეზღუდვა მოიხსნა, თუმცა კაფეებში, რესტორნებში და გასართობ სივრცეებში, მაგალითად, კლუბებში ყოფნას ღამის 00:00 საათის შემდეგ ვეღარ შეძლებთ. იგივე ეხება სასტუმროების რესტორნებსაც.

განახლება: On.ge მთელი დღის განმავლობაში ცდილობდა გარკვევას, რომელ საათამდე მოქმედებს საკვები და გასართობი დაწესებულებების შეზღუდვა. მხოლოდ დღის ბოლოსთვის მთავრობის ადმინისტრაციაში გვიპასუხეს, რომ შეზღუდვა 00:00-05:00 პერიოდში იმოქმედებს. მათივე ინფორმაციით, ეს ფორმულირება დადგენილებაში იქნება ჩაწერილი, რომელიც ჯერ არ გამოქვეყნებულა.

ამასთან, საბჭოს სხდომის შემდეგ ამირან გამყრელიძემ აღნიშნა, რომ საქართველოში ეპიდემიოლოგიური სიტუაცია უმჯობესდება მესამე ტალღის პიკთან მიმართებაში, მაგრამ ძალიან ნელი ტემპით. ამიტომ მან მოსახლეობას რეკომენდაციების დაცვისკენ მოუწოდა.

დღეს გავიგეთ ისიც, რომ ორ კვირაში საქართველოში მილიონი დოზა ვაქცინა შემოვა და როგორც პრემიერმინისტრმა ღარიბაშვილმა თქვა, დაიწყება ვაქცინაციის "ძალიან ინტენსიური" პროცესი. ჯანდაცვის მინისტრის მოადგილის, თამარ გაბუნიას თქმით, საუბარია ოთხი ტიპის ვაქცინაზე — Pfizer, AstraZeneca, Sinopharm და Sinovac.