ქართული ოცნების დეპუტატ ვლადიმერ ჩაჩიბაიას პარლამენტში სახალხო დამცველის ანგარიშის წარდგენისას პოზიტივი დააკლდა. დეპუტატის თქმით, მას ჰქონდა მოლოდინი, რომ ომბუდსმენი ხარვეზებთან ერთად მთავრობის პოზიტიურ მიღწევებზეც ისაუბრებდა.

"ცოტა გულისტკივილი მინდა დაგიფიქსიროთ იმაზე, რომ თქვენ მოხსენებაში ძირითადი აქცენტები მხოლოდ ნეგატივზე გაამახვილეთ. მე მქონდა მოლოდინი იმისა, რომ თქვენს მოხსენებაში, რა თქმა უნდა, იმ ხარვეზებთან დაკავშირებითაც ისაუბრებდით, რაზეც ძირითადად თქვენ ისაუბრეთ, მაგრამ, ასევე ყურადღებას გაამახვილებდით იმ პოზიტივსა და მიღწევებზე, რომელიც ბოლო პერიოდში განხორციელდა. მესმის, რომ აღნიშნული დოკუმენტი, რომელიც საკმაოდ მოცულობითია, ბევრ ადამიანს წვდომა არ ექნება და შეფასების წყარო იქნება თქვენი გამოსვლის მოხსენების ნაწილი. უბრალოდ მინდოდა მეთქვა, რომ ამ მოხსენებაში რომ ყოფილიყო პოზიტივი იმ კუთხით, რა კუთხითაც განხორციელდა დადებითი ნაბიჯები, უფრო მეტად მოტივატორი იქნებოდა აღმასრულებელი ხელისუფლებისთვისაც და საკანონმდებლო ხელისუფლებისთვისაც მომავალში დადებითი ნაბიჯების გადასადგმელად", — განაცხადა დეპუტატმა.

ჩაჩიბაია ამბობს, რომ მთავრობის დადებითი ნაბიჯების აღნიშნვნა "აღმასრულებელი და საკანონმდებლო ხელისუფლებისთვისაც მომავალში დადებითი ნაბიჯების გადასადგმელად მოტივატორი იქნებოდა".

"თქვენ არ ისაუბრეთ, ასევე, დეზინფორმაციაზე და ცრუ ინფორმაციაზე, რომლითაც, ვფიქრობ, ადამიანის უფლებები ილახება. თქვენ ისაუბრეთ პოლიციელების მხრიდან გადაცდომებზე, მაგრამ არ გისაუბრიათ პოლიციელებზე განხორციელებულ ძალადობებსა და დარღვევებზე. თქვენ ისაუბრეთ სავალდებულო სამხედრო სამსახურზე. თქვენს ანგარიშში დადებითად არის შეფასებული თავდაცვის სამინისტრო და დიდი მადლობა ამასთან დაკავშირებით, რადგან თავდაცვის სამინისტროში განხორციელებული რეფორმები ეფუძნებოდა თქვენს რეკომენდაციებს და კარგი იქნებოდა, ესეც გეხსენებინათ, იმიტომ, რომ თავდაცვის სამინისტროში ნამდვილად განხორციელდა მთელი რიგი რეფორმები როგორც ანაზღაურების, ასევე, მათი სამსახურის გაუმჯობესების კუთხით. მინდოდა მეთქვა, რომ თავდაცვის სამინისტროში მიმდინარე პროცესები დადებითად არის შეფასებული საერთაშორისო საზოგადოების მხრიდანაც და ამასთან დაკავშირებით პოზიტივი რომ გამოგეშვათ, ცუდი არ იქნებოდა", — აღნიშნა ქართული ოცნების დეპუტატმა.

სახალხო დამცველმა, ნინო ლომჯარიამ პარლამენტში 18 ივნისს 2020 წლის ადამიანის უფლებებისა და თავისუფლებების შესახებ წლიური ანგარიში წარადგინა. მოხსენების პრეზენტაციის შემდეგ ომბუდსმენს დეპუტატებმა კითხვები დაუსვეს.

საქართველოში ადამიანის უფლებათა და თავისუფლებათა დაცვის მდგომარეობის შესახებ სახალხო დამცველის 2020 წლის ანგარიშს სრულად შეგიძლიათ გაეცნოთ ამ ბმულზე.