ევროპარლამენტარის, ვიოლა ფონ კრამონის განცხადებით, სასამართლო სისტემაში "კლანის" არსებობა კანონის უზენაესობას ანგრევს.

"ძალიან შეშფოთებული ვარ უზენაესი სასამართლოს მოსამართლეების დაჩქარებული წესით დანიშვნით საქართველოში. 19 აპრილის შეთანხმების თანახმად, ამბიციური სასამართლო რეფორმა გადამწყვეტია და ეს უკავშირდება ევროკავშირის ფინანსურ დახმარებას საქართველოსთვის. ვენეციის კომისიის უგულვებელყოფა გონივრული არაა. "კლანის" არსებობა სასამართლო სისტემაში ანგრევს კანონის უზენაესობას", — წერს ევროპარლამენტარი ტვიტერზე.

დღეს იუსტიციის უმაღლესი საბჭო უზენაეს სასამართლოში, თბილისის საქალაქო სასამართლოში, ასევე, სააპელაციო და რაიონული (საქალაქო) სასამართლოებში ვაკანტურ ადგილებზე დანიშნავს მოსამართლეებს, ასევე, განსაზღვრავს თბილისის საქალაქო/სააპელაციო სასამართლოს კოლეგიების/პალატების შემადგენლობას. ამასთან, ნაზი ჯანეზაშვილი ვარაუდობს, რომ მოსამართლედ აირჩევენ საბჭოს არამოსამართლე წევრის, ლევან გზირიშვილის შვილსაც.

აღსანიშნავია, რომ შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმებაში წერია, რომ არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.