ქართული ოცნების ერთ-ერთი ლიდერის, მამუკა მდინარაძის განცხადებით, გიორგი გახარიას გადადგომა აწყობდა მხოლოდ ნაციონალურ მოძრაობას.

მისივე თქმით, გახარიასგან არ მოგვისმენია გადადგომის რეალური, რაციონალური, დამაჯერებლობის მინიმალური ხარისხის არგუმენტიც კი იმაზე, თუ რას შეცვლიდა მელიას დაკავების 2-3 ვადით გადადება.

"მხოლოდ ორი ვარიანტია: ეს ყველაფერი ვერ გაანალიზა, შეეშინდა და საკუთარი გუნდი ამიტომ მიატოვა ან შეგნებულად ითამაშა ნაციონალური მოძრაობის თამაში და უღალატა საკუთარ გუნდს. პირადად ჩემთვის (არსებული უტყუარი და ლოგიკური ინფორმაციების გარეშეც კი) პასუხი მარტივია… რაც შეეხება მომავალს — გახარია იბრძვის იმისთვის, რომ თვითმმართველობის არჩევნებზე: რამდენიმე დეპუტატი გაიყვანოს რამდენიმე რაიონის საკრებულოში ან ქართული ოცნება ჩამოაცილოს 43 პროცენტიან მაჩვენებელს, ანუ აქაც ნაციონალური მოძრაობის თამაში ითამაშოს. პასუხი ამ შემთხვევაშიც მარტივია: წარმოუდგენელია ნაციონალებისთვის გადამდგარი გახარიას მისია მისი პარტიის რამდენიმე წარმომადგენლის საკრებულოს წევრობა იყოს", — წერს მდინარაძე.

გიორგი გახარიამ საკუთარი პარტია, საქართველოსთვის და მისი ახალი გუნდი 29 მაისს წარადგინა. სიტყვით გამოსვლისას, მან განაცხადა, რომ ქართული ოცნება მოქალაქეების "რეალურ პრობლემებს დაშორდა" და ჩაითვალა, რომ ოპონენტებთან ბრძოლა ბევრად უფრო მნიშვნელოვანი თემა იყო. სწორედ ეს დაასახელა მან პრემიერმინისტრის თანამდებობიდან გადადგომის მიზეზად.

გიორგი გახარია პრემიერმინისტრის თანამდებობდან 18 მაისს გადადგა. მაშინ გადაწყვეტილების მიზეზად ნაციონალური მოძრაობის თავმჯდომარის, ნიკა მელიას საქმეზე გუნდში აზრთა სხვადასხვაობა დაასახელა. საკუთარი პარტიის წარდგენის შემდეგ მან ჟურნალისტებთან საუბრისას განაცხადა, რომ "მელია რა თქმა უნდა, დასაკავებელი იყო". მისი თქმით, პრობლემა იყო დაკავების ფორმა.

გაიგე მეტი: