ჯანდაცვის მსოფლიო ორგანიზაცია კორონავირუსის ვარიანტებს ბერძნული ანბანის ასოებით აღნიშნავს. დღეიდან კოვიდის ბრიტანულ შტამი აღნიშნულია როგორც ალფა, სამხრეთ აფრიკული — ბეტა, ბრაზილიური — გამა, ინდური — დელტა.

ახალმა აღნიშვნებმა უნდა ჩაანაცვლოს პრაქტიკა, როცა ახალ შტამებს იმ ქვეყნის სახელით მოიხსენიებდნენ, სადაც პირველად იქნა აღმოჩენილი. ჯანმოს მიაჩნია, რომ მსგავსი პრაქტიკა დისკრიმინაციულ ხასიათს ატარებს. თუმცა ბერძნული ასოები არ ჩაანაცვლებს კორონავირუსის ვარიანტების სამეცნიერო დასახელებას.

ინდოეთის მთავრობამ B.1.617.2-ის ვარიანტის "ინდურ შტამად" მოხსენიების გამო შეშფოთება გამოხატა, მიუხედავად იმისა, რომ ჯანმოს ეს სახელი ოფიციალურად არ დაურქმევია.